Read Свето Писмо (Гаврилова) 1990 1. Петар 4 Bible Online

1. Петар 4 - Свето Писмо (Гаврилова) 1990 bible

1. Петар 4

¹Бидејќи, пак, Христос пострада со телото за нас, тогаш вооружете се вие со таа мисла; оти, кој ќе пострада со телото, престанува да греши,

²та преостанатото време на животот во телото да не го проживее веќе со човечки похоти, туку според волјата Божја.

³Зашто доволно е што минатото време на животот го поминавте во вршење волја на незнабошците, живеејќи во нечистотија, во похоти, во пијанство, во прејадување, во препирање и во нечестиво идолопоклонство.

⁴Затоа тие и се чудат што не се дружите со нив во тој ист неуреден живот, и хулат на вас.

⁵Но тие ќе одговараат пред Оној, Кој е готов да им суди на живите и мртвите.

⁶Оти и на мртвите им беше проповедано Евангелието да примат суд како луѓето по телото, а да живеат со духот по Бога.

⁷Но близу е крајот на сѐ. Па бидете мудри и бодри во молитвите.

⁸А пред сѐ, имајте постојана љубов меѓу себе; оти »љубовта покрива многу гревови«.

⁹Бидете гостољубиви еден спрема друг без негодување.

¹⁰Служете си еден на друг, секој со дарот што го примил, како добри распоредници на разнообразната Божја благодат.

¹¹Ако некој говори, нека знае дека зборува Божји зборови; ако некој служи, нека служи според силата, која Бог ја дава, та во сѐ да се прослави Бог преку Исуса Христа, Чија слава и владеење се вечни.

¹²Возљубени, не чудете се на огненото искушение, што ви се праќа поради испитувањето, како нешто ново да ви станува;

¹³но, во колку учествувате во страдањата Христови, радувајте се, та кога ќе се јави Неговата слава да се возрадувате и развеселите.

¹⁴А ако не укоруваат за името Христово, блазе вам, оти Духот на славата, Духот Божји почива на вас: тие, значи, на Него хулат, а вие — Го прославувате.

¹⁵Никој, пак, од вас да не страда како убиец, или крадец, или злочинец, ниту како оној што се меша во туѓи работи;

¹⁶но, ако страда како христијанин, да не се срамува, туку да Го прославува Бога за таквото учество.

¹⁷Оти време е да почне судот од Божјиот дом; а ако почне најнапред од нас, тогаш каков ли ќе им биде крајот на оние, кои не му се покоруваат на Божјото Евангелие?

¹⁸И кога праведникот одвај се спасува, тогаш безбожникот и грешникот каде ќе се јават?

¹⁹И така, оние, што страдаат според волјата на Бога, нека Му ги предадат Нему, како на верен Создател, душите свои, правејќи добро.