Read Свето Писмо (Гаврилова) 1990 2. Петар 1 Bible Online

2. Петар 1 - Свето Писмо (Гаврилова) 1990 bible

2. Петар 1

¹Симон Петар, слуга и апостол на Исуса Христа, до оние, на кои преку правдата на нашиот Бог и Спасител Исус Христос им се падна да добијат заедно со нас еднаква вера:

²благодатта и мирот со познавањето на Бога и Христа Исуса, нашиот Господ, да ви се умножи.

³Бидејќи Неговата божествена сила ни подари сѐ, што е потребно за животот и побожноста, а преку познавањето на Оној, Кој нѐ повика со Својата слава и совршенство,

⁴преку кои ни се дарувани многу големи и драгоцени ветувања, та преку нив да станете учесници во Божјата природа, ако се оддалечите од гнилежните похоти на овој свет;

⁵затоа, грижејќи се за ова сестрано, принесете кон верата своја добродетел, а кон добродетелта разум,

⁶кон разумот воздржување, кон воздржувањето трпение, кон трпеливоста побожност,

⁷кон побожноста братољубивост, кон братољубивоста љубов.

⁸Оти, ако овие добродетели ги има во вас и се умножуваат, тие нема да ве остават празни, ниту бесплодни во познавањето на нашиот Господ Исус Христос.

⁹А при кого ги нема, тој е слеп, кусоглед и заборава дека се очистил од поранешните гревови.

¹⁰Браќа, затоа уште повеќе настојувајте да го зајакнете вашиот позив и избор, оти, ако го вршите тоа, никогаш нема да погрешите,

¹¹бидејќи по таков начин ќе ви се овозможи слободен влез во вечното царство на нашиот Господ и Спасител Исус Христос.

¹²Поради тоа секогаш ќе се грижам да ви ги напомнувам овие работи, иако ги знаете, и да сте утврдени во сегашната вистина.

¹³Па и право е, додека сум во ова тело, да ве подбудувам со напомнување,

¹⁴оти знам дека наскоро ќе го оставам моето тело, како што Господ наш, Исус Христос, ми јави.

¹⁵А ќе се погрижам на ова да се потсетувате секогаш и по мојата смрт.

¹⁶Зашто ние ви ја покажавме силата и доаѓањето на нашиот Господ Исус Христос не преку измислени параболи, туку откако станавме очевидци на Неговото величие.

¹⁷Оти Он прими чест и слава од Бога Отецот, кога од велелепната слава Му дојде ваков глас: »Овој е Мојот возљубен Син, во Кого е Моето благоволение«.

¹⁸И тој глас, што дојде од небото, ние го чувме, кога бевме со Него на Светата гора.

¹⁹А освен тоа, ние имаме нешто уште поверно, а тоа е пророчкото слово; и добро правите што на него му обрнувате внимание, како на светило што свети на темно место, додека денот осамне и Деницата засвети во вашите срца.

²⁰Знајте го прво тоа дека ниедно пророштво од Писмото не е сопствено кажување на пророкот.

²¹Оти никогаш според човечката волја не е изречено пророштво, туку светите Божји луѓе зборувале просветувани од Светиот Дух.