Read Свето Писмо (Гаврилова) 1990 1. Јован 3 Bible Online

1. Јован 3 - Свето Писмо (Гаврилова) 1990 bible

1. Јован 3

¹Гледајте каква љубов ни дал Отецот — да се наречеме чеда Божји и такви да бидеме. Затоа светот не нѐ знае, оти не Го позна Него.

²Возљубени, сега сме чеда Божји! Но уште не се покажа што ќе бидеме. Знаеме само дека, кога ќе се покаже, ќе бидеме слични на Него, оти ќе Го видиме каков што е.

³И секој, што ја има таа надеж во Него, се очистува самиот себе, како што е чист Он.

⁴Секој, што прави грев, прави и беззаконие; и гревот е беззаконие.

⁵А знаете дека Он се јави, за да ги земе гревовите наши; грев во Него нема.

⁶Секој, кој што пребива во Него, не греши; секој, што греши, не Го видел, ниту Го познал.

⁷Чеда, никој да не ве измамува! Кој врши правда, праведен е, како што е праведен Он.

⁸Кој прави грев, од ѓаволот е, зашто ѓаволот греши од почетокот. Па затоа и се јави Синот Божји, за да ги урне делата ѓаволски.

⁹Секој, што е роден од Бога, грев не прави, зашто семето Негово пребива во него; и не може да греши, бидејќи е роден од Бога.

¹⁰Чедата Божји и чедата ѓаволски по тоа и се познаваат. Секој, што не врши правда, не е од Бога; а и оној кој не го сака братот свој.

¹¹Оти тоа е заповедта што ја чувте од почетокот — да се сакаме еден со друг.

¹²Но не како Каин, кој што беше од лукавиот и го уби брата си. А зошто го уби? Затоа што неговите дела беа лоши, а на неговиот брат — праведни.

¹³Не чудете се, браќа мои, ако светот ве мрази.

¹⁴Ние знаеме дека преминавме од смрт во живот, бидејќи ги сакаме браќата свои; оној што не го сака братот свој, тој пребива во смртта.

¹⁵Секој, што го мрази братот свој, е човекоубиец; и познато ви е дека ниеден човекоубиец нема живот вечен, што ќе пребива во него.

¹⁶Љубовта ја познаваме по тоа, што Он ја положи за нас душата своја; но и ние сме должни да ги полагаме душите свои за браќата.

¹⁷А кој има световни блага, па кога ќе го види брата си во немаштина, та го затвори срцето свое од него — како тогаш ќе пребива во таков Божјата љубов?

¹⁸Чеда мои, да не се сакаме со зборови или со јазик, туку со дела и вистина!

¹⁹И по тоа познаваме дека сме од вистината, и пред Него ќе ги успокојуваме срцата свои;

²⁰бидејќи, ако срцето наше нѐ осуди, а колку повеќе Бог, зашто Он е поголем од нашето срце и знае сѐ.

²¹Возљубени, кога нашето срце не нѐ осудува, тогаш ние имаме слобода пред Бога,

²²и, што и да запросиме, добиваме од Него, бидејќи ги пазиме Неговите заповеди и правиме што е благоугодно пред Него.

²³А заповедта Негова е таа, да веруваме во името на Неговиот Син Исуса Христа и да се сакаме еден со друг, како што ни заповедал.

²⁴И оној, што ги пази заповедите Негови, пребива во Него, и Он — во него. А дека Он пребива во нас, узнавме по Духот, што ни Го дал.