Read Свето Писмо (Гаврилова) 1990 Судии 16 Bible Online

Судии 16 - Свето Писмо (Гаврилова) 1990 bible

Судии 16

¹Потоа Самсон дојде во Газа; таму виде една блудница и влезе при неа.

²Им јавија на жителите од Газа: »Самсон дојде овде«. И обиколуваа, го чекаа цела ноќ при градските порти и се криеја цела ноќ, велејќи: »До осамнување ќе чекаме и ќе го убиеме.«

³А Самсон спиеше до полноќ; на полноќ стана, ги искорна вратите на градските порти со двата довратника, ги крена заедно со диреците, ги стави на грб и ги оденсе на врвот од гората, која е на патот за Хеврон и ги остави таму.

⁴Потоа тој засака една, која живееше во долината Сорек; името и беше Далида.

⁵Дојдоа кај неа филистејските кнезови и ѝ рекоа: »Запрашај го и дознај во што му е големата сила, и како да го надмудриме, за да го врземе и да го смириме; ние, пак, ќе ти дадеме за тоа секој по илјада и сто сикли сребро.«

⁶Тогаш Далида го праше Самсона: »Кажи ми, во што ти е големата сила, и со што би можеле да те врзат, за да те смират?«

⁷Самсон ѝ одговори: »Ако ме врзат со седум сурови тетиви, уште неисушени, јас ќе станам бессилен и ќе бидам како другите луѓе.«

⁸И ѝ донесоа филистејските кнезови седум сурови тетиви, уште неисушени, и таа го врза со нив.

⁹Во тоа време еден од нив седеше сокриен во спалната нејзина; и таа рече: »Самсоне, Филистејците идат против тебе.« Тој ги раскина тетивите, како што се раскинува коноп кога ќе го гори оган. И не се дозна за силата негова.

¹⁰И Далида му рече на Самсона: »Ете, ти ме измами и ми кажа лага; кажи ми сега, со што можат да те врзат?«

¹¹Тој ѝ одговори: »Кога би ме врзале со нови јажиња, кои не биле употребени, јас би станал бессилен и ќе бидам како другите луѓе.«

¹²Далида зеде нови јажиња, го врза и му рече: »Самсоне, Филистејците доаѓаат против тебе.« Во тоа време еден од нив седеше сокриен во спалната. И тој ги скина јажињата од рацете свои како конци.

¹³И Далида пак му рече на Самсона: »Ти сѐ ме мамиш и ми говориш лага; кажи ми, со што можат да те врзат?« Тој одговори: »Ако привиеш седум перчиња од косата на главата моја, на вратило и ги забиеш со колец на камен јас ќе бидам бессилен како другите луѓе.«

¹⁴И го успа Далида на колената свои. И кога тој заспа, Далида зеде седум перчиња од косата на главата негова, ги приви на вратилото и со колец ги притегна на камен и му рече: »Филистејците идат против тебе, Самсоне!« Тој се разбуди од сонот и го извлече кросното сплеткано од основата и вратилото, и пак не се дозна за силата негова.

¹⁵И Далида тогаш му рече: »Зошто зборуваш ‚те сакам‘, а срцето твое не е со мене? Ете, ме измами трипати и не ми кажа, во што е твојата голема сила.«

¹⁶И бидејќи таа го возменураваше со зборовите свои секој ден и го мачеше, душата негова му се натажи до смрт.

¹⁷И тој ѝ го откри целото свое срце, велејќи н: »Бербер не се допрел до главата моја, зашто јас сум назореј Божји од мајчината си утроба: ако ме истриже некој, ќе ме напушти силата моја; јас ќе ослабам и ќе бидам како другите луѓе.«

¹⁸Далида, откако виде, дека тој ѝ го откри целото срце свое, испрати и ги повика филистејските кнезови, велејќи им: »Дојдете сега; тој ми го откри целото срце свое.« И тие дојдоа кај неа и донесоа сребро во рацете свои.

¹⁹И Далида го успа на колената свои, па повика еден човек, та му заповеда да ги истриже седумте плетенки на главата негова. И тој почна да ослабува, и силата негова го напушти.

²⁰Таа тогаш рече: »Филистејците доаѓаат против тебе, Самсоне!« Тој се разбуди од сонот свој и рече: »Ќе отидам, како и порано, и ќе се ослободам.« Но не знаеше, дека Господ отстапил од него.

²¹Филистејците го фатија и му ги извадија очите, го доведоа во Газа и го оковаа со две бакарни вериги, и тој мелеше во затворот.

²²Меѓутоа, косата на главата негова, откако беше истрижен, почна пак да расте.

²³Филистејските кнезови се собраа, за да принесат голема жртва на Дагона, својот бог, и да се провеселат, па рекоа: »Нашиот бог го предаде во рацете наши нашиот непријател Самсон.«

²⁴Исто така и народот, откако виде, го прославуваше својот бог, велејќи: »Нашиот бог ни го предаде во рацете наши непријателот наш и опустошителот на земјата наша, кој порази многумина од нас.«

²⁵А кога се развесели срцето нивно, рекоа: »Повикајте го Самсона од затворот за да нѐ развесели.« И го повикаа Самсона од затворот, и тој ги веселеше и го ставија меѓу два столба.

²⁶И Самсон му рече на момчето, што го водеше за рака: »Дозволи ми да ги напипам столбовите, врз кои се крепи домот, и да се потпрам на нив.« Момчето така и направи.

²⁷А домот беше полн со мажи и жени: таму беа сите филистејски кнезови, и на покривот имаше до три илјади мажи и жени, кои гледаа во Самсона како ги веселеше.

²⁸Повика Самсон кон Господа и рече: »Господи Боже, спомни си за мене и поддржи ме само сега, о Боже, за да им се одмаздам веднаш на Филистејците за двете очи мои.«

²⁹И ги помести Самсон од местото двата средни столба, врз кои се крепеше домот, откако наблегна врз нив, на едниот со десната рака, а на другиот со левата.

³⁰И Самсон рече: »Умри, душо моја, со Филистејците!« И притисна со сета сила, и домот се урна врз кнезовите и врз сиот народ, што беше со него. И умрените, што ги уби при смртта своја, беа повеќе, отколку тој што беше умртвил во текот на целиот живот свој.

³¹И дојдоа браќата негови и целиот негов татков дом, го зедоа, па отидоа и го погребаа меѓу Сарај и Естаол, во гробот на татко му Маној. Тој беше судија над Израилот дваесет години. По Самсона се издигна Емегар, Енановиот син, и уби од другите племиња шестотини души, освен добитокот. И тој го спаси Израилот.