Read Свето Писмо (Гаврилова) 1990 Судии 7 Bible Online

Судии 7 - Свето Писмо (Гаврилова) 1990 bible

Судии 7

¹И порани Јеровоам, односно Гедеон, утрината и сиот народ, што беше со него, и се сместија при изворот Арад; мадијамскиот, пак, логор беше на север од него, кај ридот Море, во долината.

²И Господ му рече на Гедеона: »Со тебе има многу народ, не можам да ги предадам Мадијамците во негови раце, за да не се возгордее Израилот пред Мене и да каже: ‚мојата рака ме спаси‘.

³Затоа разгласи да чуе народот, и кажи: ‚Кој се бои и е плашлив, нека се врати и веднаш нека оди на гората Галад‘«. И се вратија од народот дваесет и две илјади души, а десет илјади останаа.

⁴И му рече Господ на Гедеона: »Народ сѐ уште има многу; одведи ги кај водата, таму ќе ти ги одберам; за кого ќе речам: ‚да оди со тебе‘, нека оди со тебе; а за кого ќе ти кажам: ‚не треба да оди со тебе‘, нека не оди.«

⁵Тој го одведе народот кај водата. И му рече Господ на Гедеона: »Кој лока вода со јазикот свој, како што лока куче, него стави го настрана, исто така и сите оние, што клекнуваат за да пијат вода.«

⁶И бројот на оние, што локаа со уста од рака, беше триста души; а сиот друг народ коленичеше, за да пие вода.

⁷И му рече Господ на Гедеона: »Со тие триста, што локаа, ќе ве спасам и ќе ви ги предадам Мадијамците во рацете ваши, а сите други нека си одат секој во своето место«.

⁸И тие ја зедоа храната од народот за себе и трубите нивни, и Гедеон ги распушти сите Израилци по шаторите, а задржа кај себе триста души. Мадијамскиот логор, пак, беше подолу од него — во долината.

⁹Во онаа ноќ Господ му рече: »Стани, слези во логорот, зашто ти го предадов во твои раце.

¹⁰Ако, пак, се плашиш да слезеш сам, оди во логорот со Фара, слугата свој;

¹¹и ќе чуеш што зборуваат, и тогаш ќе се зацврстат рацете твои, и ќе слезеш во логорот«. И слезе тој и Фара, слугата негов, до војниците, што беа во логорот.

¹²А Мадијамците и Амаликовците и сите жители од исток се беа сместиле по долината во големо множество, како скакулци; камилите нивни беа безброј, беа многу — како песокот на морскиот брег.

¹³Гедеон дојде. И ете, еден му го раскажува сонот на друг и вели: »Сонив дека еден тркалезен јачменов леб се тркала по мадијамскиот логор и откако се отркала до шаторот, удри во него така, што тој падна, го собори, и шаторот се растури.«

¹⁴Другиот му одговори: »Тоа не е ништо друго, туку мечот на Гедеона, Јоасовиот син, Израилецот; Бог ги предал во рацете негови Мадијамците и целиот логор.«

¹⁵Откако го чу прикажувањето за сонот и толкувањето негово, Гедеон Му се поклони на Господа, се врати во Израилскиот логор и рече: »Станувајте! Господ го предаде во рацете ваши мадијамскиот логор.«

¹⁶И ги распореди тристоте души на три чети и на сите им даде по една труба и празни стомни и во стомните свеќи.

¹⁷И им рече: »Гледајте ме мене и правете го истото; ете, ќе се доближам до логорот, и што ќе правам јас, тоа правете го и вие.

¹⁸Кога јас и тие, што се со мене ќе затрубиме со труба, трубете и вие со вашите труби околу целиот логор и викајте: ‚Меч Господов и Гедеонов!‘«

¹⁹И дојде Гедеон и сто души со него до крајот на логорот, во почетокот на средната стража, ги разбудија стражарите, затрубија со трубите и ги скршија стомните, што беа во рацете нивни.

²⁰И затрубија сите три чети со труби, и ги скршија стомните, и ги држеа во левата рака свеќите, а во десната рака трубите, трубеа и викаа: »Меч Господов и Гедеонов!«

²¹И секој стоеше на местото свое околу логорот; тогаш во целиот логор се растрчаа, развикаа и почнаа да бегаат.

²²Дедека тие триста души трубеа со труби, Господ го сврте мечот на секого притив другарот негов по целиот стан, и војската бегаше до Бетшита кај Царер, до пределите на Авелмехол, близу до Табата.

²³Тогаш Израилците од племето Нефталимово, Асирово и од целото племе Манасиево беа повикани и се впуштија по Мадијамците.

²⁴А Гедеон испрати пратеници по целата гора Ефремова да кажат: »Излезете им во пресрет на Мадијамците и заземете им ги бродовите во водите на Ветир и Јордан.« И беа повикани сите Ефремовци, и ги зазедоа бродовите во водите на Ветир и Јордан;

²⁵И ги фатија двајцата мадијамски кнезови: Орива и Зива; Орива го убија во Сур, а Зива — во Јакевзив, и ги гонеа Мадијамците; главите, пак, на Орива и Зива му ги однесоа на Гедеон од онаа страна на Јордан.