Read Свето Писмо (Гаврилова) 1990 Судии 8 Bible Online

Судии 8 - Свето Писмо (Гаврилова) 1990 bible

Судии 8

¹И му рекоа Ефремовците: »Зошто направи така, та нѐ повика, кога замина да војуваш против Мадијамците?« И многу се караа со него.

²Гедеон им одговори: »Па што направив така, како вие сега? Нели се пабирките на Ефрема подобри од гроздоберот на Авиезер?

³Во ваши раце Бог ги предаде мадијамските кнезови Орива и Зива, и како можев јас да сторам такво нешто, како вие?« Тогаш духот нивни спрема него се смири штом тој им ги кажа тие зборови.

⁴А кога дојде Гедеон кај Јордан, го премина тој и тристоте души, што беа со него. Тие беа уморни поради гонењето на непријателот.

⁵И им рече тој на жителите на Сокхот: »Дајте им леб на овие мажи што се со мене, зашто се гладни; јас ги гонам мадијамските цареви Зевеја и Салмана.«

⁶Сокхотските началници рекоа: »Зар раката на Зевеја и Салмана е веќе во твои раце, та да ѝ даваме леб на војската твоја?«

⁷Гедеон одговори: »Не така, туку кога Господ ќе ги предаде Зевеја и Салмана во рацете мои, јас ќе ги уништам телата ваши со трње од пустињата и со боцки.«

⁸Оттука отиде во Фануил и им го рече истото на неговите жители, и фануилските жители му одговорија, како што одговорија жителите на Сокхот.

⁹Тој им кажа и на фануилските жители: »Кога ќе се вратам во мир, ќе ја растурам таа кула.«

¹⁰А Зевеј и Салман беа во Каркара и војските нивни со нив до петнаесет илјади, сѐ што беше останало од сета војска на жителите од исток; а паднаа сто и дваесет илјади души мечоносци.

¹¹И отиде Гедеон при оние што живееја во шатори на исток од Нов и Јегевал и го разби логорот, кога логорот стоеше безгрижно.

¹²Зевеј и Салман избегаа; тој се спушти по нив и ги фати двајцата цареви — Зевеја и Салмана, и го доведе во збрка целиот логор.

¹³Тогаш Гедеон, синот на Јоаса, се врати од војната пред изгревот на сонцето.

¹⁴И фати едно момче од жителите сокхотски и го распраша; и тој му ги напиша имињата на началниците и старешните сокхотски — седумдесет и седум души.

¹⁵Потоа дојде кај жителите сокхотски и рече: »Ете, Зевеј и Салман, за кои ми се потсмевавте, велејќи: ‚Зар раката на Зевеја и Салмана е веќе во твои раце, та да им даваме леб на твоите изморени дуѓе?‘«

¹⁶И зеде трње од пустињата и боцки, па ги казни со нив градските старешини, жители на Сокхот.

¹⁷и ја сруши фануилската кула и ги уби градските жители.

¹⁸И му рече на Зевеја и Салмана: »Какви беа оние, што ги убивте на Тавор?« Тие одговорија: »Беа како тебе — секој прилегаше на царски син.«

¹⁹Гедеон рече: »Тие беа мои браќа, синови на мајка ми! Господ нека ми е сведок: да бевте ги оставиле живи, не би ве убил ни јас.«

²⁰И му рече на Јетера, својот првороден син: »Стани, убиј ги!« Но момчето не го извади мечот свој; се плашеше, бидејќи беше уште млад.

²¹Тогаш Зевеј и Салман рекоа: »Стани сам и порази нѐ, зашто според човекот е и силата негова.« И стана Гедеон, и ги уби Зевеја и Салмана, и ги зеде веришките, што беа околу вратовите на камилите нивни.

²²И му рекоа Израилците на Гедеона: »Владеј со нас ти и син ти и внук ти, бидејќи ти нѐ спаси од рацете на Мадијамците.«

²³Гедеон им одговори: »Ниту јас ќе владеам со вас, ниту мојот син ќе владее со вас; Господ нека владее со вас.«

²⁴И им рече уште Гедеон: »Ве молам за едно, дајте ми секој по еден накит од пленот свој. Зашто непријателите, бидејќи беа Исмаилци, имаа многу златен накит.«

²⁵Тие одговорија: »Ќе дадеме.« И послаа една облека и фрлаше таму секој по еден накит од пленот свој.

²⁶Златните накити, што тој ги измоли, тежеа илјада и седумстотини сикли, освен веришките, копчињата и пурпурните одежди, што ги носеа мадијамските цареви, и освен златните веришки што беа на вратовите од камилите нивни.

²⁷Од тоа Гедеон направи Ефод и го стави во својот град, во Ефрат; и почнаа сите Израилци блудно да одат таму, по ефодот, кој беше замка за Гедеона и целиот дом негов.

²⁸Така се смирија Мадијамците пред синовите Израилеви и повеќе не кренаа глава, и земјата беше спокојна четириесет години во деновите на Гедеона.

²⁹И отиде Јероваал, Јоасовиот син, и живееше во својот дом.

³⁰Гедеон имаше седумдесет сина, произлезени од бедрата негови, бидејќи имаше многу жени.

³¹А и наложницата, која живееше во Сихем, му роди син, и нему му даде име Авимелех.

³²И умре Гедеон, синот Јоасов, во длабока старост, и беше погребан во гробот на таткото свој, Јоас, во Ефрат Авиезеров.

³³Откако умре Гедеон, Израилевите синови пак почнаа да одат блудно по Вааловци и го поставуја за свој бог Ваалверита.

³⁴Израилевите синови не се сетија на Господа, својот Бог, Кој ги беше спасувал од рацете на сите околни непријатели,

³⁵и кон домот на Јероваала, односно на Гедеона, не покажаа благодарност за сите добрини што му ги направи Тој на Израилот.