Read Свето Писмо (Гаврилова) 1990 Откровение 13 Bible Online

Откровение 13 - Свето Писмо (Гаврилова) 1990 bible

Откровение 13

¹Потоа застанав на морскиот песок и видов како од морето излегува ѕвер со седум глави и десет рогови; на роговите негови имаше десет круни, а на главите негови — богохулни имиња.

²Ѕверот, кого го видов, прилегаше на леопард: нозете му беа како кај мечка, а устата — како уста на лав. И змевот му ја даде силата своја, и престолот свој, и голема власт.

³И видов, дека една од главите негови како да беше смртно ранета, но таа смртна рана му заздраве. Тогаш се зачуди целата земја и тргна по ѕверот; и му се поклонија на змевот, кој што му беше дал власт на ѕверот;

⁴му се поклонија и на ѕверот, велејќи: »Кој е како ѕверот, и кој може да војува со него?«

⁵Нему му се даде уста, што зборуваше големи зборови и богохулства; и му се даде власт така да прави четириесет и два месеца.

⁶Тогаш ја отвори устата за хулење против Бога, за да го похули името Негово, живеалиштето Негово и оние, што живеат на небото.

⁷И му се даде да војува против светиите и да ги победи; му се даде власт над секое колено, јазик и народ.

⁸И му се поклонија сите жители земни, чии имиња не се запишани во книгата на животот при Агнецот, заклан од созданието на светот.

⁹Кој има уво, нека чуе:

¹⁰кој во ропство води, во ропство ќе биде одведен; кој со меч убие, со меч треба да биде убиен. Тука е трпението и верата на светиите.

¹¹И видов друг ѕвер како излегува од земјата. Тој имаше два рога како кај јагне и зборуваше како змев.

¹²И со сета власт на првиот ѕвер тој дејствуваше пред него и ја тераше целата земја и жителите нејзини да му се поклонат на првиот ѕвер, чија смртна рана се беше исцелила;

¹³и правеше големи чуда, па дури и оган да симнува од небото на земјата пред луѓето.

¹⁴И ги мамеше жителите земни со чудата, што му беа дадени да ги врши пред ѕверот, велејќи им на жителите земни да му направат лик на ѕверот, кој што имаше рана од меч и остана жив.

¹⁵И му се даде да вложи дух во ликот на ѕверот, та да прозборува тој и да направи да бидат убиени оние, кои нема да му се поклонат на ѕверовиот образ.

¹⁶И ќе направи на сите — мали и големи, богати и сиромаси, слободни и робови — да им се стави белег на десната рака или на челата нивни,

¹⁷та никој да не може ни да купува, ниту да продава, освен оние, што го имаат тој белег, или името на ѕверот, или бројот на името негово.

¹⁸Тука е мудроста. Кој има ум, нека го пресмета бројот на ѕверот, бидејќи е број на човек, и бројот му е шестотини шеесет и шест.