Read Свето Писмо (Гаврилова) 1990 Откровение 22 Bible Online

Откровение 22 - Свето Писмо (Гаврилова) 1990 bible

Откровение 22

¹И ми покажа чиста река со вода на животот, бистра како кристал, која истекуваше од престолот на Бога и на Агнецот.

²Среде главната улица и од двете страни на реката — дрвото на животот, што раѓа плодови дванаесет пати, давајќи плод секој месец; а лисјата на дрвото служат за исцелување на народите.

³И нема веќе да има никакво проклетство; престолот на Бога и на Агнецот ќе биде во градот; Неговите слуги ќе Му служат

⁴и ќе Го гледаат лицето Негово, а името Негово ќе им биде на челата нивни.

⁵И ноќ нема да има таму, и не ќе имаат потреба од светило, ниту од сончева светлина, бидејќи Господ Бог ќе ги осветлува, и ќе царуваат во веки веков.

⁶И ми рече: »Овие зборови се верни и вистинити. Господ, Бог на светите пророци, го испрати ангелот Свој, за да им покаже на Своите слуги, што ќе стане наскоро.

⁷Еве, доаѓам скоро; блажен е оној, кој ги пази пророчките зборови на оваа книга!«

⁸И јас, Јован, го видов и го чув ова; и кога го чув и видов, паднав за да се поклонам пред нозете на ангелот, кој што ми го покажа ова.

⁹Но тој ми рече: »Стој, немој, оти сум и јас слуга како ти, и браќата твои — пророци и оние, што ги држат зборовите на оваа книга. Поклони Му се на Бога!«

¹⁰И ми рече: »Не запечатувај ги пророчките зборови на оваа книга, бидејќи времето е блиску!

¹¹Кој чини неправда, нека чини неправда уште; и кој е осквернет, нека се осквернува уште; и кој е праведен, нека чини правда уште; и кој е свет, нека се осветува уште.

¹²И еве, ќе дојдам скоро, и отплатата Моја е со Мене, за да му дадам на секого според делата негови.

¹³Јас сум Алфа и Омега, Почеток и Свршеток, Првиот и Последниот!«

¹⁴Блажени се оние, што ги исполнуваат заповедите Негови, за да бидат достојни за дрвото на животот и да влезат во градот низ портите.

¹⁵А надвор се кучињата, вражачите, блудниците, убијците, идолопоклониците и секој, што сака да лаже и лаже.

¹⁶Јас, Исус, го испратив Својот ангел да ви го посведочи ова по црквите. Јас сум корен и род Давидов, сјајната ѕвезда Деница.

¹⁷И Духот и невестата велат: »Дојди!« И кој чуе, нека каже: »Дојди!« И кој е жеден, нека дојде, и кој сака, нека земе од водата на животот дарум.

¹⁸И Јас му сведочам на секого, кој што ги слуша пророчките зборови на оваа книга. Ако некој нешто додаде кон нив, нему Бог ќе му наметне поразии напишани во оваа книга.

¹⁹Ако некој одземе од пророчките зборови на оваа книга, Бог ќе му одземе дел од книгата на животот, и од светиот град, и од она, што е напишано во оваа книга.

²⁰Зборува оној, што го сведочи ова: »Да, ќе дојдам скоро!« — Амин! »Да, дојди, Господи Исусе!«

²¹Благодатта на нашиот Господ Исус Христос со сите вас. Амин!