Read Свето Писмо (Гаврилова) 1990 Откровение 3 Bible Online

Откровение 3 - Свето Писмо (Гаврилова) 1990 bible

Откровение 3

¹И на ангелот на Сардската црква напиши му: еве што вели Оној, Кој ги има седумте ѕвезди — ги знам делата твои; носиш име дека си жив, а си мртов.

²Биди буден и утврдувај ги оние, што се на умирање; бидејќи делата твои не ги најдов совршени пред Мојот Бог.

³Помни, пак, како си примил и чул, и пази, и покај се. Ако не бидеш буден, ќе дојдам врз тебе како крадец, и нема да узнаеш, кога ќе дојдам над тебе.

⁴Но во Сард имаш малку имиња, што не ги осквернија алиштата свои. Тие ќе одат со Мене во бела облека, бидејќи се достојни.

⁵Кој победува, ќе се облече во бела облека, и нема да му го избришам името негово од книгата на животот, туку ќе го признаам името негово пред Мојот Отец и пред Неговите ангели.

⁶Кој има уво, нека чуе, што им зборува Духот на црквите.

⁷И на ангелот на Филаделфиската црква напиши му: вака вели Светиот, Вистинскиот, Оној, Кој го има клучот Давидов, Кој отвора, и никој нема да затвори — и Кој затвори, никој не ќе отвори —

⁸ги знам делата твои. Ете, ти дадов врата отворена, и никој не може да ја затвори; ти имаш мала сила и сепак го запази словото Мое, и не одречувај се од името Мое.

⁹Ете, ќе ти дадам некои од сатанската зборница — оние, што велат дека се Јудејци, а не се, туку лажат — ете, ќе направам да дојдат и да се поклонат пред нозете твои и да познаат, дека Јас те засакав.

¹⁰Бидејќи ти го запази словото на трпението Мое, и Јас ќе те запазам од часот на искушението, кое ќе дојде над целата вселена, за да ги искуша оние што живеат на земјата.

¹¹Ете, идам скоро: држи, што имаш, за да не го земе никој венецот твој.

¹²Оној, кој победува, ќе го направам столб во храмот на Мојот Бог, и нема веќе да излезе надвор; и ќе го напишам над него името на Мојот Бог и името на градот на Мојот Бог, на новиот Ерусалим, кој слегнува од небото од Мојот Бог, и Моето ново име.

¹³Кој има уво, нека чуе, што им зборува Духот на црквите.

¹⁴И на ангелот на Лаодикиската црква напиши му: ова го вели Амин, Верниот и Вистинскиот Сведок, Почетокот на Божјото создание —

¹⁵ги знам делата твои: ти не си ни студен, ни жежок; о, да беше студен или жежок!

¹⁶Така, бидејќи си млак, и не жежок, ниту студен, ќе те изблуам од устата Своја.

¹⁷Оти велиш: »Богат сум, и се збогатив, и ништо не ми треба«, а не знаеш дека си беден и проколнат, сиромав, слеп и гол;

¹⁸те советувам да си купиш од Мене злато, низ оган пречистено, за да се збогатиш; и бело облекло, за да се облечеш, и да не се гледа срамот на голотијата твоја, и со очна маст намачкај ги очите твои, за да гледаш.

¹⁹Кои Јас ги сакам, нив ги карам и казнувам. И така, биди ревностен и покај се.

²⁰Ете, стојам пред вратата и чукам. Ако некој го чуе гласот Мој и ја отвори вратата, ќе влезам при него и ќе вечерам со него, и тој со Мене.

²¹На оној, што победува, ќе му позволам да седне со Мене на Мојот престол, како што и Јас победив и седнав со Отецот Свој на Неговиот престол.

²²Кој има уво, нека чуе, што им зборува Духот на црквите.