Read Свето Писмо (Гаврилова) 1990 Откровение 6 Bible Online

Откровение 6 - Свето Писмо (Гаврилова) 1990 bible

Откровение 6

¹И видов кога Агнецот скрши еден од седумте печати, и чув едно од четирите животни да зборува како со глас на грмотевица: »Дојди и види!«

²И видов, ете, бел коњ, и на него јавач со лак; и Му беше даден венец, и тој излезе како победник, за да победи.

³А кога го извади вториот печат, го чув второто животно да зборува: »Дојди и гледај!«

⁴И излезе друг коњ, црвен; и на јавачот му беше дадено да го одземе мирот на земјата, та еден со друг да се убиваат; и му беше даден голем меч.

⁵А кога се отвори третиот печат, го чув третото животно да зборува: »Дојди и види!« И видов, ете вран коњ, а на него јавач со мерила во раката своја.

⁶И чув глас среде четирите животни, кој зборуваше: »Шиник пченица за динариј, и три шиника јачмен за динариј; но растителното масло и виното ќе ги нема!«

⁷А кога се раскрши четвртиот печат, го чув гласот на четвртото животно како зборуваше: »Дојди и гледај!«

⁸И видов. И ете сив коњ, а на него јавач, чие име беше смрт; и адот врвеше по него, и му се даде власт над четвртина од земјата — да убива со меч и глад, со помор и земни ѕверови.

⁹А кога го симна петтиот печат, под жртвеникот ги видов душите заклани заради словото Божјо и за сведоштвото, што го имаа

¹⁰и викаа со висок глас, велејќи: »До кога, Владико, свети и вистинити, нема да судиш и да им се одмаздуваш за нашата крв на оние, што живеат на земјата?«

¹¹И на секого од нив им се дадоа бели облеки, и им се рече да починат уште малку време, додека не се дополни бројот на нивните сотрудници и браќа, што ќе бидат убиени, како и тие.

¹²И видов, кога се крена шестиот печат. И, ете, настана голем земјотрес, и сонцето стана црно како вреќа од кострет, и месечината стана како крв;

¹³ѕвездите, пак, небески паднаа на земјата, како што смоквата, лулана од силен ветар, ги исфрла пупките свои;

¹⁴и небото се оттргна како книга свиткана, и секоја гора и секој остров се поместија од местата свои;

¹⁵и царевите земни, и благородниците, и богатите, и војводите, и силните, и секој роб и слободен се сокрија во пештери и горски камењари,

¹⁶велејќи им на планините и на карпите: »Паднете врз нас и сокријте нѐ од лицето на Оној, Кој седи на престолот и од гневот на Агнецот,

¹⁷зашто дојде големиот ден на Неговиот гнев, и кој може да устои?«