Read Свето Писмо (Гаврилова) 1990 1 Царства 3 Bible Online

1 Царства 3 - Свето Писмо (Гаврилова) 1990 bible

1 Царства 3

¹Момчето Самуил Му служеше на Господа при Илиј; словото Господово беше ретко во тие денови и немаше виденија.

²И се случи во она време, кога Илиј лежеше на местото свое, — очите негови беа почнале да се премрежуваат, и тој не можеше да гледа, —

³и светилникот Божји уште не беше угаснал, а Самуил лежеше во храмот Господов, каде што беше ковчегот Божји;

⁴Господ повика кон Самуила: »Самуиле! Самуиле!« Тој одговори: »Еве ме!«

⁵И притрча при Илиј и рече: »Еве ме! Ти ме викаше.« Но тој одговори: »Јас не сум те викал; оди легни си!« И тој отиде и си легна.

⁶Но Господ повика по вторпат кон Самуила: »Самуиле, Самуиле!« Тој стана и пак отиде кај Илиј и рече: »Еве ме! Ти ме повика?« Но тој рече: »Јас не сум те викал, синко; оди легни си!«

⁷Самуил уште не го познаваше тогаш гласот на Господа, уште не му се беше открило словото Господово.

⁸Викна Господ кон Самуила и третпат. Тој стана и отиде при Илиј и рече: »Еве ме! Ти ме повика?« Тогаш Илиј разбра, дека Господ го вика момчето.

⁹И му рече Илиј на Самуила: »Оди легни си, и кога Оној што вика, ќе те повика, ти кажи: ‚Говори, Господи, бидејќи Твојот слуга слуша.‘« И отиде Самуил и легна на местото свое.

¹⁰И Господ дојде, застана и викна, како првиот и вториот пат: »Самуиле! Самуиле!« И Самуил рече: »Говори Господи, бидејќи Твојот слуга слуша.«

¹¹И му рече Господ на Самуила: »Еве, што ќе извршам во Израилот, за кое, кој ќе чуе, ќе му писнат и двете уши.

¹²Во тој ден Јас ќе го исполнам над Илиј сѐ она што сум зборувал за домот негов; Јас ќе почнам и ќе завршам.

¹³Јас му јавив дека ќе го казнам домот негов засекогаш заради онаа вина, која тој ја знаеше, бидејќи синовите негови бесчествуваа, и тој не ги запираше.

¹⁴И поради тоа се колнам пред домот на Илиј, дека вината на Илиниот дом нема да се избрише довека ниту со жртви, ниту со лебни приноси.«

¹⁵Самуил спиеше до утрината, (и стана рано) и ја отвори вратата на домот Господов; Самуил се плашеше да му соопшти на Илиј за тоа видение.

¹⁶Но Илиј го повика Самуила и рече: »Синко Самуиле!« Тој одговори: »Еве ме!«

¹⁷И рече Илиј: »Што ти беше речено? Не криј од мене; тоа и тоа нека ти направи Господ тебе, и уште повеќе нека направи, ако сокриеш од мене од сѐ што ти беше кажано.«

¹⁸И Самуил му соопшти сѐ и не сокри од него ништо. Тогаш Илиј рече: »Он е Господ; што Му е угодно, тоа и нека направи.«

¹⁹Самуил порасна, и Господ беше со него; и не остана ни еден Негов збор неисполнет.

²⁰И сиот Израил од Дан дури до Вирсавија дозна дека Самуил е удостоен да биде пророк Господов.

²¹И Господ продолжуваше да се јавува во Силом, откако му се беше открил на Самуила во Силом преку словото Господово. И во сиот Израил, од крај до крај на земјата, се уверија дека Самуил, е пророк Господов. Илиј, пак, остаре многу, а синовите негови продолжуваа да одат по лукав пат пред Господа.