Read Magandang Balita Biblia Job 11 Bible Online

Job 11 - Magandang Balita Biblia bible

Job 11

¹Sumagot naman si Zofar na isang Naamita,

²“Palalampasin na lang ba ang napakarami mong sinabi? Tama ba ang isang tao kapag ito ay maraming salita?

³Akala mo ba'y di masasagot ang mga sinabi mo, at sa iyong pangungutya, kami'y di na makapagsasalita?

⁴Ipinipilit mong tama ang iyong paniniwala, at sa harap ng Diyos ika'y malinis na lubos.

⁵Magsalita sana ang Diyos upang ika'y masagot.

⁶Upang masabi sa iyo ang mga lihim ng karunungan, sapagkat napakalalim ng kanyang kaalaman, parusa nga niya sa iyo'y mas maliit kaysa iyong kasalanan.

⁷“Masusukat mo ba ang kapangyarihan ng Diyos? Kanyang kadakilaan, iyo bang maaabot?

⁸Higit itong mataas kaysa kalangitan, at mas malalim kaysa daigdig ng mga patay.

⁹Malawak pa iyon kaysa sanlibutan, higit na malaki kaysa karagatan.

¹⁰Kung dakpin ka ng Diyos at iharap sa hukuman, mayroon bang sa kanya'y makakahadlang?

¹¹Kilala ng Diyos ang taong walang kabuluhan, kitang-kita niya ang kanilang kasamaan.

¹²Ang hangal ay maaaring tumalino kung ang mailap na asno ay ipinanganak nang maamo.

¹³“Ang iyong puso, Job, sa Diyos mo isuko at sa kanya iabot ang mga kamay mo.

¹⁴Alisin mo ang kasalanan sa iyong mga kamay, linisin mo sa kasamaan ang iyong tahanan.

¹⁵At taas noo kang haharap sa sanlibutan, matatag ang loob, walang kinatatakutan.

¹⁶Mga pagdurusa mo ay malilimutan, para lamang itong bahang nagdaan.

¹⁷Magliliwanag ang iyong buhay, higit pa sa sikat ng araw, ang buhay mong nagdilim ay magbubukang-liwayway.

¹⁸Papanatag ang buhay mo at mapupuno ng pag-asa; iingatan ka ng Diyos, at bibigyan ng pahinga.

¹⁹Wala kang kaaway na katatakutan; maraming lalapit sa iyo upang humingi ng tulong.

²⁰Ngunit ang masama, kabiguan ang madarama, walang kaligtasan kahit saan sila magpunta, at kamatayan lamang ang kanilang pag-asa.”