Read Magandang Balita Biblia Job 13 Bible Online

Job 13 - Magandang Balita Biblia bible

Job 13

¹“Lahat ng sinabi mo ay narinig ko na rin,

²Ang alam mo'y alam ko rin, hindi ka higit sa akin.

³Hindi kayo ang kausap ko kundi ang Diyos na Makapangyarihan, sa kanya ko idudulog itong aking kalagayan.

⁴Ngunit kayo'y mga sinungaling, tulad ninyo'y manggagamot, na walang kayang pagalingin.

⁵Tumahimik na lamang sana kayo, baka akalain pa ng iba na kayo'y matalino.

⁶Pakinggan ninyo ngayon ang aking sasabihin, at ang aking panig ay inyong unawain.

⁷Bakit ba kayo'y nagsasalita ng di katotohanan? Makatutulong ba sa Diyos ang inyong kasinungalingan?

⁸Kayo ba ang tatayo at siya ay ipaglalaban? Kayo ba ang magtatanggol sa kanyang kalagayan?

⁹Kung siyasatin kayo ng Diyos, ano kaya ang makikita, siya ba'y inyong madadayang tulad ng iba?

¹⁰Tiyak na siya'y magagalit, kayo ay pagsasabihan, kahit pa lihim na mayroon kayong kinikilingan.

¹¹Sasakmalin kayo ng takot pagkat siya'y makapangyarihan.

¹²Mga kasabihan ninyo'y walang silbi tulad ng abo, singhina ng putik ang mga katuwiran ninyo.

¹³“Tumahimik na lang kayo at ako'y pasalitain, hayaang mangyari ang mangyayari sa akin.

¹⁴Nakahanda akong itaya ang buhay kong angkin.

¹⁵Hindi ako natatakot kung ako man ay patayin, maiharap lamang sa kanya itong aking usapin.

¹⁶Maaaring iligtas ako ng aking katapangan, sapagkat wala namang masamang tao na makakaharap sa Maykapal.

¹⁷Pakinggan mong mabuti itong aking sasabihin, itong paliwanag ko ay iyong unawain.

¹⁸Nakahanda akong ilahad ang aking panig, sapagkat alam ko namang ako ay nasa katuwiran.

¹⁹“O Diyos, lalapit ka ba upang ako'y usigin? Kung gayon, handa akong manahimik at mamatay.

²⁰Mayroon akong dalawang kahilingan, at ako'y di magtatago kung iyong papayagan.

²¹Itigil mo na itong pagpaparusa sa akin, at sa takot ay huwag mo akong patayin.

²²“Magsalita ka, at aking tutugunin, o kaya'y sagutin mo ang aking sasabihin.

²³Saan ba ako nagkamali, ano ba ang aking kasalanan? Pagkakasala ko'y maaari ko bang malaman?

²⁴“Bakit ako'y iyong pinagtataguan? Bakit itinuturing mo akong isang kaaway?

²⁵Para akong isang dahon, huwag mo na akong takutin, ang katulad ko'y ipa, na tinatangay ng hangin.

²⁶Kay pait naman ng iyong mga paratang, kasalanan ko noong ako'y bata iyo pang ibinibilang.

²⁷Itong aking mga paa'y nilagyan pa ng gapos, tinitingnan, sinusuri ang aking bawat kilos.

²⁸Kaya't ako'y parang kahoy na nabubulok, parang damit na nasisira, unti-unting nauubos.