Read Magandang Balita Biblia Job 15 Bible Online

Job 15 - Magandang Balita Biblia bible

Job 15

¹Ang sagot ni Elifaz na taga-Teman,

²“Mga salita mo'y pawang kahangalan, ang sinasabi mo ay parang hangin lang.

³Ang sinasabi mo'y salita ng isang hangal, di ka maililigtas ng salitang walang saysay.

⁴Kung ikaw ang masusunod, wala nang matatakot sa Diyos, at nais mong hadlangan ang sa kanya'y dumudulog.

⁵Kasamaan mo'y nahahalata sa iyong mga salita, nais mo pang magtago sa mga salitang may daya.

⁶Kaya nga ang humahatol sa iyo ay hindi ako, salita mong binibigkas ang humatol sa iyo.

⁷“Akala mo ba'y ikaw ang unang taong isinilang? Nauna ka pa ba sa mga kabundukan?

⁸Naroon ka ba nang sabihin ng Diyos ang kanyang plano, o sa palagay mo'y ikaw lang ang may talino?

⁹Ano ba ang alam mo na di namin nalalaman? Lahat ng naiintindihan mo'y amin ding nauunawaan.

¹⁰Ang mga may uban sa buhok ay aming kasama, mga taong matatanda pa sa iyong ama.

¹¹“Inaaliw ka ng Diyos ngunit ayaw mong pansinin, ang banayad naming payo na sa puso nanggagaling.

¹²Bakit nagmamatigas pa, ipinipilit ang sarili? Mga mata'y nanlilisik, kapag tinitingnan kami.

¹³Bakit ba ang galit mo'y sa Diyos ibinubunton at sa kanya iniuukol ang salitang walang hinahon?

¹⁴“Sino ba ang walang sala, at malinis na lubos? Sinong isinilang na matuwid sa harap ng Diyos?

¹⁵Kung doon sa mga anghel, tiwala ng Diyos ay di lubusan, kahit silang nasa langit ay mayroon ding pagkukulang.

¹⁶Gaano pa kaya ang taong nasanay sa kasamaan, laging uhaw sa masama at hindi tama.

¹⁷“Makinig ka at sa iyo'y aking sasabihin, ang lahat ng nakita ko at naabot ng paningin.

¹⁸Mga taong matatalino ang sa akin ay nagturo, mga katotohanang inilahad ng kanilang mga ninuno.

¹⁹Ang lupain ay sa kanila lamang ibinigay at walang dayuhan na sa kanila'y nakipanirahan.

²⁰“Ang taong mapang-api at puno ng kasamaan, laging nasa ligalig habang siya'y nabubuhay.

²¹Lagi siyang makakarinig nakakatakot na tinig, papasukin siya ng tulisan kung kailan siya'y tahimik.

²²Hindi siya makakatakas sa lagim ng kamatayan pagkat mayroong tabak na sa kanya'y nag-aabang.

²³Mga buwitre'y naghihintay upang kainin ang kanyang bangkay,[16] alam niyang madilim ang kanyang kinabukasan.

²⁴Takot ang naghahari sa buo niyang katauhan, parang laging hinahabol ng haring makapangyarihan.

²⁵“Ganito ang sasapitin ng taong nagyayabang at ng humahamon sa Diyos na Makapangyarihan.

²⁶Ipinagmamalaki pa ang ginagawang pagsuway at ang palagi niyang hawak ay kanyang kalasag, at ang hangad ay habulin at labanan ang Maykapal.

²⁸Siya ay nanakop ng maraming bayan, mga bahay na nilisan ay kanyang kinamkam, ngunit mga iyon ay mawawasak pagdating ng digmaan.

²⁹Ang kayamanan niya ay hindi magtatagal, maging ang buhay niya'y madali ring papanaw.

³⁰Sa gitna ng dilim siya'y makukubkob, siya'y matutulad sa punongkahoy na nasunog, na ang bulaklak ay tinatangay ng hangin.

³¹Dahil nagtiwala siya sa kahangalan, kahangalan din ang kanyang kabayaran.

³²Maaga niyang tatanggapin ang kanyang kabayaran, tulad ng sangang nalanta, di na muling mananariwa.

³³Makakatulad niya'y ubas na kahit hilaw na bunga'y nalalagas, at tulad ng olibo na ang mga bulaklak ay nalalaglag.

³⁴Walang matitira sa lahi ng masama, masusunog ang bahay na sa suhol nagmula.

³⁵Ganyan ang mga taong nagbabalak ng kasamaan, pandaraya ang palaging nasa puso at isipan.”