Read Magandang Balita Biblia Job 18 Bible Online

Job 18 - Magandang Balita Biblia bible

Job 18

¹Sumagot si Bildad na Suhita,

²“Kay rami naman ng iyong sinasabi, tumahimik ka muna at pakinggan kami.

³Kami ba'y ano sa iyong palagay? Mga bakang hangal at walang nalalaman?

⁴Sarili mo lang ang iyong sinasaktan, dahil sa galit na iyong tinataglay. Pababayaan ba ang daigdig dahil lamang sa iyo, at aalisin ang mga bundok sa kanilang puwesto?

⁵“Ang ilaw ng masama'y tiyak na papatayin, ang kanyang apoy ay di na papaningasin.

⁶Ang ilaw sa kanyang tahana'y pagdidilimin.

⁷Ang matatag niyang hakbang ngayon ay nabubuwal, pagbagsak niya'y nalalapit sa kanya ring kasamaan.

⁸Di niya namamalayang ang kanyang mga paa ay sa bitag pupunta,

⁹kaya naman nasisilo itong kanyang mga paa.

¹⁰Isang silo ang sa kanya'y iniumang, may bitag na nakahanda sa kanyang daraanan.

¹¹“Saanman siya bumaling, takot ay naghihintay; sinusundan siya nito sa bawat hakbang.

¹²Mayaman siya noon ngunit ngayo'y hikahos, naghihintay sa kanya'y hirap at pagdarahop.

¹³Nakamamatay na sakit, sa katawan niya'y kumakalat, mga bisig at paa niya'y unti-unting naaagnas.

¹⁴Dati siya'y panatag sa kanyang tahanan; ngayo'y kinakaladkad patungo kay Kamatayan.

¹⁵May iba nang nakatira doon sa dati niyang tahanan, matapos malagyan ng gamot at malinis nang lubusan.

¹⁶Ang kanyang mga ugat at mga sanga, lahat ay natuyo at pawang nalanta.

¹⁷Lahat niyang alaala ay napawi nang lubusan; nakalimutan nang lahat pati kanyang pangalan.

¹⁸Mula sa liwanag, inihagis siya sa karimlan, at pinalayas siya sa daigdig ng mga buháy.

¹⁹Isang anak man o apo ay wala siyang naiwan, ni isa'y walang natira sa kanyang sambahayan.

²⁰Mula silangan hanggang kanluran, nanginginig at kinikilabutan dahil sa kanyang matinding kasawian.

²¹Ang masasamang tao'y ganyan ang kapalaran, mga di kumikilala sa Diyos ganyan ang kahihinatnan.”