Read Magandang Balita Biblia Job 19 Bible Online

Job 19 - Magandang Balita Biblia bible

Job 19

¹Ang sagot ni Job,

²“Hanggang kailan ninyo ako pahihirapan sa mga salitang inyong binibitawan?

³Maraming ulit na ninyo akong nilait, di na kayo nahiya na sa aki'y magmalabis.

⁴Kung nakagawa man ako ng kasalanan; walang ibang mananagot kundi ako lamang.

⁵Akala ninyo kayo'y mas mabuti kaysa akin, pinagbabatayan ninyo'y ang hirap kong pasanin.

⁶Dapat ninyong malaman, ang Diyos ang may gawa nito; ang bitag niyang iniumang ay nasa paligid ko.

⁷Tumututol ako sa ganitong karahasan, ngunit walang nakikinig sa sigaw kong katarungan.

⁸Hinarangan ng Diyos ang aking daraanan; binalot niya ng dilim ang landas kong lalakaran.

⁹Inalis niyang lahat ang aking kayamanan, sinira pa niya ang aking karangalan.

¹⁰Saanman ako bumaling, ako'y kanyang pinapalo, parang punong binunot, pag-asa ko'y natutuyo.

¹¹Matindi ang galit ng Diyos sa akin; isang kaaway ang sa aki'y kanyang turing.

¹²Ang hukbo niya ay tinipon at ako ay kinubkob, ang aking tahanan ay kanilang sinakop.

¹³“Ang mga kapatid ko'y pinalayo niya sa akin; mga dating kakilala, hindi na ako pinapansin.

¹⁴Pati mga kamag-anak ko'y nag-alisan; naiwan akong walang kaibigan.

¹⁵Dati kong mga panauhi'y di na ako kilala; para na akong dayuhan sa aking mga alila.

¹⁶Ang utos ko sa kanila'y hindi na rin pinapansin, makiusap man ako'y ayaw pa rin akong sundin.

¹⁷Pati na ang asawa ko'y nandidiri sa akin; mga kapatid ko sa laman, ayaw akong makapiling.

¹⁸Ako'y kinukutya ng mga batang paslit; kapag ako'y nakita, pinagtatawanan at nilalait.

¹⁹Mga kaibigan kong matalik sa akin ay nasusuklam, ang mga minamahal ko, ako'y nilalayuan.

²⁰Buto't balat na lamang ang natitira sa akin, ang pag-asa kong mabuhay, maliit na at katiting.

²¹Mga kaibigan ko, sa akin sana'y mahabag; kamay na ng Diyos ang sa aki'y humahampas.

²²Bakit n'yo ako inuusig tulad ng ginagawa ng Diyos? Di pa ba kayo masaya sa kahirapan kong lubos?

²³“Ang mga salita ko sana'y maisulat at maitala sa isang buong aklat!

²⁴At maiukit sa bato itong mga sinabi ko upang habang panaho'y mabasa ng mga tao.

²⁵Ngunit alam kong di natutulog ang aking Tagapagligtas,[18] na magtatanggol sa akin pagdating ng wakas.

²⁶Pagkatapos na maubos itong aking buong balat, makikita ko ang Diyos kahit laman ay maagnas.

²⁷Siya'y aking mamamasdan, at mukhaang makikita; siya'y makikilala nitong aking mga mata. Ang puso ko'y nananabik na masdan ko na siya.

²⁸“Ako ay patuloy ninyong uusigin, pagkat iniisip ninyong ang sala nga ay sa akin.

²⁹Kayo sana ay mag-ingat sa talim nitong tabak, na siyang maghahatid ng parusa sa kasalanan, upang inyong malamang may hahatol nga sa wakas.”