Read Magandang Balita Biblia Job 20 Bible Online

Job 20 - Magandang Balita Biblia bible

Job 20

¹Sinabi ni Zofar na Naamita,

²“Ang iyong mga sinabi ay hindi ko na nagugustuhan kaya hindi ko na mapigilan ang pagsali sa usapan.

³Ang iyong mga sinabi ay puro panlalait, kaya't tugon ko ngayo'y aking ipababatid.

⁴“Hindi mo ba nalalaman na buhat pa sa simula, nang ang tao ay ilagay sa ibabaw ng lupa,

⁵ang pagmamataas ng masama ay di nagtatagal,

⁶umabot man sa langit ang kanyang katanyagan, at ang kanyang ulo, sa ulap ay umabot man.

⁷Ngunit tulad ng alabok, ganap siyang mapaparam; ang hantungan niya'y hindi alam ng sinuman.

⁸Siya'y parang panaginip na mawawala, parang pangitain sa gabi, di na muling makikita.

⁹Di na siya muli pang makikita ng mga dating kaibigan at kapamilya.

¹⁰Makikisama sa mahihirap ang kanyang mga anak; kayamanang kinamkam, mapapabalik lahat.

¹¹Ang lakas ng kabataan na dati niyang taglay, kasama niyang mahihimlay sa alabok na hantungan.

¹²“Ang lasa ng kasamaan para sa kanya ay matamis, ninanamnam pa sa dila, samantalang nasa bibig.

¹³Itong kanyang kasamaan ay hindi niya maiwan; kahit gusto man niyang iluwa ay di niya magagawa.

¹⁴Ngunit nang ito'y lunukin, dumaan sa lalamunan, ubod pala ng pait, lason sa katawan.

¹⁵Kayamanang kinamkam niya, kanya ngayong isusuka; palalabasin nga ng Diyos mula sa kanyang bituka.

¹⁶Ang nilulunok ng taong masama ay tulad ng kamandag, parang tuklaw ng isang ahas na sa kanya ay papatay.

¹⁷Ang mga ilog at batis na siyang dinadaluyan ng pulot at gatas ay di na niya mamamasdan.

¹⁸Di rin niya papakinabangan lahat ng pinaghirapan; di niya malalasap ang naipong kayamanan,

¹⁹sapagkat ang mahihirap ay inapi niya, kinamkam ang mga bahay na itinayo ng iba.

²⁰“Kanyang pagkagahaman ay walang katapusan, walang nakakaligtas sa kanyang kasakiman.

²¹Kapag siya'y kumakain, wala siyang itinitira, ngunit ang kasaganaan niya ngayo'y magwawakas na.

²²Sa kanyang kasaganaan, daranas ng kagipitan at siya'y daratnan ng patung-patong na kahirapan.

²³Kumain na siya't magpakabusog! Matinding galit ng Diyos sa kanya'y ibubuhos.

²⁴Makaligtas man siya sa tabak na bakal, palasong tanso naman ang sa kanya'y magbubuwal.

²⁵Kapag ito'y itinudla sa apdo niya ay tutusok; kung makita niya ito, manginginig siya sa takot.

²⁶Matinding kadiliman ang sa kanya'y naghihintay; masusunog siya sa apoy na hindi namamatay. Wala ring matitira sa kanyang pamilya.

²⁷Ipahahayag ng langit ang kasamaan ng taong ito, laban sa kanya, ang lupa'y magpapatotoo.

²⁸Ang lahat ng kayamanan niya ay sisirain, sa galit ng Diyos ito ay tatangayin.

²⁹“Ganito ang sasapitin ng lahat ng masasama, kapasyahan ng Diyos, sa kanila'y itinakda.”