Read Magandang Balita Biblia Job 22 Bible Online

Job 22 - Magandang Balita Biblia bible

Job 22

¹Ang sagot ni Elifaz na taga-Teman:

²“Ang tao ba'y may maitutulong sa Diyos na Manlilikha, kahit na siya'y marunong o kaya ay dakila?

³May pakinabang ba ang Makapangyarihang Diyos kung ikaw ay matuwid, may mapapala ba siya kung ikaw man ay malinis?

⁴Dahil ba sa takot mo sa kanya, kaya ka niya sinasaway, pinagsasabihan at dinadala sa hukuman?

⁵Hindi! Ito'y dahil sa napakalaki ng iyong kasalanan, at sa mga ginagawa mong mga kasamaan.

⁶Mga kapatid mo'y iyong pinaghuhubad, upang sa utang nila sa iyo sila'y makabayad.

⁷Ang mga nauuhaw ay hindi mo pinainom; hindi mo pinakain ang mga nagugutom.

⁸Lakas mo ang ginagamit kaya lupa'y nakakamkam, at ibinibigay ito sa iyong kinalulugdan.

⁹Hindi mo na nga tinulungan ang mga biyuda, inaapi mo pa ang mga ulila.

¹⁰Kaya napapaligiran ka ngayon ng mga bitag, at bigla kang binalot ng mga sindak.

¹¹Paligid mo'y nagdidilim kaya di ka makakita, maging tubig nitong baha ay natatabunan ka.

¹²“Di ba't ang Diyos ay nasa mataas na kalangitan, at ang mga bituin sa itaas ay kanyang tinutunghayan?

¹³Ngunit ang sabi mo, ‘Ang Diyos ay walang nalalaman, at hindi tayo mahahatulan, pagkat sa ulap siya'y natatakpan.’

¹⁴Akala mo'y dahil sa ulap ay di na siya makakakita, at sa ibabaw ng himpapawid, ay palakad-lakad lang siya.

¹⁵“Talaga bang nais mong lakaran ang dating daan, landas na tinahak ng mga nasanay sa kasamaan?

¹⁶Kahit wala pa sa panahon sila'y tinatangay na ng baha, sapagkat ang kanilang pundasyon ay lubos na nagiba.

¹⁷Sinabi nila sa Diyos na sila'y kanyang layuan, at wala naman daw magagawa sa kanila ang Diyos na Makapangyarihan.

¹⁸Sa kabila nito, sila pa rin ay pinagpala; di ko talaga maunawaan ang pag-iisip ng masama.

¹⁹Natutuwa ang matuwid, ang mabuti'y nagagalak kapag nakita nilang ang masama'y napapahamak.

²⁰Sabi nila, ‘Ang mga kaaway nati'y nalugmok, at ang mga ari-arian nila ay natupok.’

²¹“Sumang-ayon ka sa Diyos, makipagkasundo ka sa kanya, ang buhay mo'y gaganda at magiging maginhawa.

²²Makinig ka sa kanyang itinuturo, mga sinasabi niya'y itanim mo sa iyong puso.

²³Manumbalik ka sa Makapangyarihan, ikaw ay magpakumbaba, at alisin mo sa iyong tahanan lahat ng gawaing masama.

²⁴Ang lahat mong kayamanan ay itapon mo sa alabok, at ang mamahaling ginto ay ihagis mo na sa ilog.

²⁵Ang Diyos na Makapangyarihan ang ituring mong yaman, na siyang ginto't pilak na iyong papahalagahan.

²⁶Sa Makapangyarihang Diyos ka palaging magtiwala, at ang Maykapal ang pagkukunan mo ng tuwa.

²⁷Papakinggan niya ang iyong panalangin, kaya't ang mga panata mo ay iyong tuparin.

²⁸Lagi kang magtatagumpay sa iyong mga balak, at ang landas mo ay magliliwanag.

²⁹Ang mga palalo'y ibinabagsak nga ng Diyos, ngunit inililigtas ang mapagpakumbabang-loob.

³⁰Ililigtas ka niya kung wala kang kasalanan, at kung ang ginagawa mo ay nasa katuwiran.”