Read Magandang Balita Biblia Job 31 Bible Online

Job 31 - Magandang Balita Biblia bible

Job 31

¹“Ako'y taimtim na nangako sa aking sarili, na di titingin nang may pagnanasa sa ibang babae.

²Anong ginagawa ng Makapangyarihang Diyos sa atin? Anong gantimpala niya sa ating gawain?

³Ibinibigay niya'y kapahamakan at pagkasira, sa mga taong gumagawa ng mali at masama.

⁴Lahat ng ginagawa ko'y kanyang nalalaman, kitang-kita niya ang aking bawat hakbang.

⁵“Pagsisinungaling ay hindi ko ginawa, kahit isang tao'y wala akong dinaya.

⁶Timbangin sana ako ng Diyos sa maayos na timbangan, at makikita niya itong aking katapatan.

⁷Kung ako'y lumihis sa landas ng katuwiran, o kaya'y naakit gumawa ng kalikuan, kahit na bahagya'y natukso ng kasamaan,

⁸masira nawa ang aking pananim, at ang mga halaman ko'y iba na ang kumain.

⁹“Kung ako ay naakit sa asawa ng iba, sa pintuan ng kanyang bahay ay inabangan ko siya,

¹⁰di bale nang asawa ko'y sa iba magsilbi, at siya'y sipingan ng ibang lalaki.

¹¹Ang pakikiapid ay karumal-dumal na kasalanan, kasamaang nararapat sa hatol na kamatayan.

¹²Pagkat iyon ay apoy na di mamamatay, at iyon ang tutupok sa aking buong kabuhayan.

¹³“Kung sana'y may inapi ako sa aking mga utusan, at dahil doo'y nagharap sila ng karaingan.

¹⁴Di ako kikibo ako ma'y parusahan, siyasatin man ako'y walang ibibigay na kasagutan.

¹⁵Pagkat ang Diyos na sa akin ay lumalang, siya ring lumikha sa aking mga utusan.

¹⁶“Di ako nagkait ng tulong kailanman, sa mga biyuda at nangangailangan.

¹⁷Di ko pinabayaan ang mga ulila, kapag ako'y kumain, kumakain din sila.

¹⁸Sa buong buhay ko sila'y aking tinulungan, inalagaan, mula pa sa aking kabataan.

¹⁹“Ang makita kong walang damit pagkat walang maibili,

²⁰binibigyan ko ng makapal na damit, kaya't pasasalamat niya'y walang patid.

²¹“Kung ang mga ulila'y aking inapi, pagkat alam kong sa hukuma'y ako ang magwawagi,

²²mabuti pang mga bisig ko ay baliin, at sa aking balikat ito ay tanggalin.

²³Sapagkat sa parusa ng Diyos ako'y natatakot, hindi ko kayang gawin ang gayong gawaing baluktot.

²⁴“Kung ako ay umasa sa aking kayamanan, at gintong dalisay ang pinanaligan;

²⁵kung dahil sa tinatangkilik, ako ay nagyabang, o nagpalalo dahil sa aking kayamanan;

²⁶kung ang araw at ang buwan ay aking sinamba;

²⁷kung ako'y natangay kahit na lihim lamang, o nagpugay kaya sa sarili kong kamay;

²⁸ako nga'y nagkasala at dapat hatulan, pagkat itinakwil ko ang Diyos na Makapangyarihan.

²⁹“Pagdurusa ng kaaway, hindi ko ikinatuwa, ni sa kanilang kapahamakan ako ay nagsaya;

³⁰kahit minsa'y di ko idinalangin na sila'y mamatay.

³¹Mapapatunayan ng aking mga kasamahan, mabuti ang pagtanggap ko sa mga dayuhan.

³²Pinatutuloy ko sila sa aking tahanan, at di sila hinayaang matulog sa lansangan.

³³Kung itinago ko ang aking kasalanan, at kamalian ko ay aking pinagtakpan;

³⁴at kung dahil sa takot sa iba at sa kanilang pagkutya, ako ay nanahimik at di na nagpakita.

³⁵“Mayroon sanang nakikinig sa mga sinasabi ko, isinusumpa kong lahat ito'y pawang totoo. Sagutin sana ako ng Diyos na Makapangyarihan, kung isusulat ng kaaway ang kanyang mga paratang.

³⁶Ito'y aking ikukwintas at isusuot na parang korona.

³⁷Sasabihin ko sa Diyos ang lahat ng aking ginawa, sa paglapit sa kanya'y wala akong dapat ikahiya.

³⁸“Kung ang lupa kong binubungkal ay inagaw sa iba, sa pagtutol ng may-ari'y sapilitan kong kinuha.

³⁹O kung sa ani nito ako'y nagpasasa, samantalang nagugutom ang dito'y nagsaka.

⁴⁰Kung gayon ay bayaang damo't tinik ang tumubo, sa halip na sebada o trigo ang doo'y lumago.” Dito nagwawakas ang pagsasalita ni Job.