Read Magandang Balita Biblia Job 36 Bible Online

Job 36 - Magandang Balita Biblia bible

Job 36

¹Idinagdag pa ni Elihu,

²“Magtiyaga ka pa nang kaunti at makinig sa akin, pagkat ayon sa Diyos itong aking sasabihin.

³Ibubuhos kong lahat ang aking nalalaman upang patunayang ang aking Diyos ay makatarungan.

⁴Lahat ng sasabihin ko ay pawang katotohanan, pagkat akong kausap mo'y malawak ang kaalaman.

⁵“Ang Diyos ay dakila at di nagtatakwil ng sinuman, siya ay dakila sa taglay niyang kaalaman.

⁶Hindi niya pinatatagal ang buhay ng mga makasalanan, ang mga mahihirap ay binibigyan niya ng katarungan.

⁷Ang matuwid ay kanyang iniingatan, ginagawang parang hari, at binibigyang-karangalan sa lahat ng sandali.

⁸Kung ang tao'y nagagapos o natatanikalaan o kaya'y nagdurusa sa nagawang kasalanan,

⁹ipinamumukha ng Diyos ang kanilang kasamaan, at ang naghaharing hambog na isipan.

¹⁰Sila'y kanyang sinasaway at binabalaan na tumalikod sa kanilang kasamaan.

¹¹Kung sila ay makinig at sa Diyos ay maglingkod, buhay na sagana at payapa, sa kanila'y idudulot.

¹²Ngunit kapag sila'y di nakinig at pinairal ang kamangmangan, tiyak na kamatayan ang kanilang hahantungan.

¹³“Poot ang naghahari sa dibdib ng masama, parusahan man ng Diyos, ayaw pa ring magmakaawa.

¹⁴Sa kanilang kabataan sila ay namamatay, nagwakas sa kahihiyan ang kanilang mga buhay.

¹⁵Ang tao'y pinaghihirap ng Diyos upang bigyang-aral, at kanyang pinagdurusa upang mabuksan ang kanilang pananaw.

¹⁶“Inalis ka ng Diyos sa kaguluhan, pinagtamasa ka niya ng kapayapaan, at pinuno ng pagkain ang iyong tahanan.

¹⁷Ngunit ngayon, ikaw ay pinaparusahan bilang katumbas ng iyong kasamaan.

¹⁸Huwag mong pabayaang suhulan ka ng sinuman, mag-ingat upang di mailigaw ng mga kayamanan.

¹⁹Dumaing ka man nang dumaing ay wala nang mangyayari, ang taglay mong lakas ngayon ay wala na ring silbi.

²⁰Huwag mong naising ang gabi'y dumating na, ang oras na ang mga bansa ay mawawala na.

²¹Huwag mong isipin ang magpakasama, ito ang dahilan kaya ika'y nagdurusa.

²²“Alalahanin mong ang Diyos ay makapangyarihan, pinakadakilang guro sa lahat ng bagay.

²³Walang makakapagsabi sa Diyos ng dapat niyang gampanan, at walang kasamaang maaaring ibintang.

²⁴Lahat ay nagpupuri sa kanya dahil sa kanyang ginagawa, kaya ikaw man ay magpuri rin at sa kanya'y dumakila.

²⁵Ang mga gawa niya, lahat ay namasdan, ngunit hindi ito lubos na maunawaan.

²⁶Di masusukat ng tao ang kanyang kadakilaan, at ang kanyang mga taon ay hindi rin mabibilang.

²⁷“Ang tubig sa lupa'y itinataas ng Diyos, upang gawing ulan at sa daigdig ay ibuhos.

²⁸Ang mga ulap ay ginagawa niyang ulan, at masaganang ibinubuhos sa sangkatauhan.

²⁹Sa galaw ng mga ulap ay walang nakakaalam, at kung paano kumukulog sa kalangitan.

³⁰Pinagliliwanag niya ang kalawakan sa pagguhit ng kidlat, ngunit nananatiling madilim ang kailaliman ng dagat.

³¹Pinapamahalaan niya ang tao sa ganitong paraan, at masaganang pagkain, tayo'y hindi pinagkaitan.

³²Ang kidlat ay kanyang hinahawakan, at pinababagsak sa nais niyang matamaan.

³³Ipinapahayag ng kidlat ang kanyang kalooban, at ang kanyang galit laban sa kasamaan.