Read Magandang Balita Biblia Job 5 Bible Online

Job 5 - Magandang Balita Biblia bible

Job 5

¹“Sumigaw ka, Job, kung may sasagot sa iyo. Mayroon bang anghel na sa iyo'y sasaklolo?

²Ang sama ng loob ay pumapatay sa mga taong hangal. Ang pagkainggit ay kumikitil sa mga taong mangmang.

³Nakakita na ako ng mga hangal na panatag kung titingnan, ngunit bigla kong sinusumpa ang kanilang mga tahanan.

⁴Walang matakbuhan ang kanilang mga anak, walang sinuman ang sa kanila'y magligtas.

⁵Ang kanilang ani'y kinakain ng mga gutom, kahit ang nasa tinikan, inaagaw sa kanila. Ninanasa ng mga uhaw ang kayamanan nila.

⁶Ang kahirapa'y hindi sa alabok nagmula, at ang kaguluha'y hindi tumutubo sa lupa.

⁷Tiyak na daranas ng kahirapan ang tao, kung paanong may tilamsik ng apoy sa apuyan.

⁸“Kung ako sa iyo, lalapit ako sa Diyos, at ang aking kalagayan, sa kanya idudulog.

⁹Mga dakilang gawa niya'y di natin mauunawaan, mga kababalaghan niya ay walang katapusan.

¹⁰Ang lupa'y pinadadalhan niya ng ulan, mga bukiri'y kanyang pinatutubigan.

¹¹Ang nagpapakumbaba ay kanyang itinataas, ang mga nalulungkot, kanyang inililigtas.

¹²Mga pakana ng mga tuso'y kanyang sinisira, kaya anumang gawin nila'y wala silang napapala.

¹³Ang mga tuso'y inihuhulog niya sa sarili nilang bitag, kanilang mga pakana'y kaagad nagwawakas.

¹⁴Di makita ang daan kahit na sa araw, sila'y nangangapa kahit katanghalian.

¹⁵Ngunit inililigtas ng Diyos ang mga ulila, iniaahon niya sa kaapihan ang mga dukha.

¹⁶Binibigyan niya ng pag-asa ang mga dukha, pinatatahimik niya ang masasama.

¹⁷“Mapalad ang taong dinidisiplina ng Diyos na Makapangyarihan, ang pagtutuwid niya sa iyo'y huwag mong ipagdamdam.

¹⁸Ginagamot niya ang kanyang nasugatan, pinapagaling niya ang kanyang nasaktan.

¹⁹Sa tuwi-tuwina, paningin niya'y nasa iyo, upang ikaw ay ingatan, laging handang sumaklolo.

²⁰Sa panahon ng taggutom, di ka niya pababayaan, at kung sa digmaan ay hindi ka niya iiwan.

²¹Ililigtas ka niya sa dilang mapanira, at di ka matatakot sa kapahamakan.

²²Kaguluhan at taggutom, iyo lamang tatawanan, at mababangis na hayop, hindi mo katatakutan.

²³Walang mga bato sa bukid na iyong sasakahin, maiilap na hayop, di ka lalapain.

²⁴Magiging ligtas ang iyong tahanan, at ang iyong mga kawan ay hindi mababawasan.

²⁵Ang lahi mo ay di mapipigil sa paglaki; tulad ng damo, ang mga supling mo ay darami.

²⁶Tatamasahin mo ang mahabang buhay, katulad ng bungang nahinog sa panahon ng anihan.

²⁷Ang mga ito'y aming matagal na pinag-aralan, pakinggan mo't alamin pagkat ito'y katotohanan.”