Read Magandang Balita Biblia Job 7 Bible Online

Job 7 - Magandang Balita Biblia bible

Job 7

¹“Ang buhay ng tao'y punung-puno ng pagod, tulad ng kawal at manggagawang pilit na pinaglingkod.

²Siya'y tulad ng alipin, na naghahanap ng lilim, tulad ng manggagawa, sahod ang ninanasa.

³Buhay ko'y wala nang kahulugan sa paglipas ng mga buwan, at tuwing sasapit ang gabi ako ay nagdadalamhati.

⁴Ang gabi ay matagal, parang wala nang umaga, di mapanatag sa higaan, hanggang umaga'y balisa.

⁵Itong buo kong katawan ay tadtad ng mga sugat, inuuod, kumikirot, ang nana ay lumalabas.

⁶Mga araw ko'y lumilipas nang walang pag-asa, kay bilis umikot parang sa makina.

⁷“Alalahanin ninyong ang buhay ko'y isang hininga lamang, hindi na ako muling makakakita nang kabutihan.

⁸Kaunting panahon na lang at ako ay papanaw, di na ninyo ako makikita, at di na matatagpuan.

⁹Tulad ng ulap na napapadpad at naglalaho, kapag namatay ang tao, di na siya makakabalik sa mundo.

¹⁰Hindi na siya makakauwi kailanman, mga kakilala niya, siya'y malilimutan.

¹¹Kaya ako'y hindi mapipigil na magbuka nitong bibig, upang ibulalas ang pait sa loob ng aking dibdib.

¹²Bakit ako'y inyong binabantayan? Ako ba'y dambuhalang mula sa karagatan?

¹³Ako ay nahihiga upang ako'y magpahinga, upang kahit sandali sakit ko ay mapawi.

¹⁴Ngunit maging sa pagtulog ako'y iyong tinatakot, masasamang panaginip, pangitain at mga bangungot.

¹⁵Kaya, nais ko pang ako ay mabigti, kaysa mabuhay sa katawang may pighati.

¹⁶Ako'y hirap na hirap na, ayaw ko nang mabuhay; iwan mo na ako, buhay ko'y wala rin lang saysay.

¹⁷“Ano ba ang tao upang iyong pahalagahan, bakit pinapansin mo ang kanyang mga galaw?

¹⁸Tuwing umaga siya'y iyong sinusuri, sinusubok mo siya sa bawat sandali.

¹⁹Kahit saglit, ilayo mo sa akin ang iyong tingin, nang ako'y magkapanahon na laway ay lunukin.

²⁰Kung ako'y nagkasala, ano ba naman iyon sa iyo? Ikaw na tagapagmasid ng mga tao, bakit ba ako ang napagbubuntunan mo? Ako ba ay isang pabigat sa iyo?

²¹Bakit di pa patawarin ang aking kasalanan? Bakit di pa kalimutan ang aking pagkukulang, ako rin lang ay patungo na sa huli kong hantungan? Ako'y iyong hahanapin ngunit di matatagpuan.”