Read Magandang Balita Biblia Mga Awit 10 Bible Online

Mga Awit 10 - Magandang Balita Biblia bible

Mga Awit 10

¹O Yahweh, bakit masyado kang malayo? Sa panahon ng gulo, bakit ka nagtatago?

²Inaapi ang mga dukha ng palalo't walang-awa; nawa'y sila ang mahuli sa patibong nilang gawa.

³Ipinagyayabang ng masasama ang kanilang mga hangarin; si Yahweh ay nilalait at sinusumpa ng mga sakim.

⁴Ang sabi ng masasamang tao, “Diyos ay walang pakialam,” sabi nila'y “walang Diyos,” dahil sa kanilang kahambugan.

⁵Ang masasama'y palaging nagtatagumpay; ang hatol ng Diyos ay di nila nauunawaan, palagi nilang tinutuya ang kanilang mga kaaway.

⁶Sinasabi nila sa sarili, “Hindi kami mabibigo; kaguluhan sa buhay, hindi namin matatamo.”

⁷Namumutawi sa bibig nila'y sumpa, banta at pandaraya, dila nila'y laging handa sa marumi't masamang pananalita.

⁸Sa mga nayon sila'y nag-aabang, upang paslangin ang walang kamalay-malay.

⁹Para silang leon na nasa taguan, mga kawawang dukha'y inaabangan, hinuhuli ang mga ito sa kanilang bitag, at pagkatapos ay kinakaladkad.

¹⁰Dahan-dahan silang gumagapang, upang biktimahin ang mga mahihina.

¹¹Ganito ang sabi ng masasama, “Ang Diyos ay walang pakialam! Mata niya'y nakapikit, di niya ako mapagmamasdan.”

¹²Gumising ka, O Yahweh, at ang masasama'y parusahan, silang mga naghihirap ay huwag mong kalimutan!

¹³Bakit hinahayaan ng Diyos na hamakin siya ng masasama, na nagsasabing ang parusahan sila'y di raw niya magagawa?

¹⁴Subalit nakikita mo ang hirap at kaapihan, at ikaw ay palaging handang dumamay. Ang mga kapus-palad ay sa iyo lang umaasa, sa tuwina'y sumasaklolo ka sa mga ulila.

¹⁵Mga braso ng masasama'y iyong baliin, parusahan mo sila't kasamaa'y sugpuin.

¹⁶Naghahari si Yahweh magpakailanpaman, mga bansang may ibang Diyos, sa lupa'y mapaparam.

¹⁷Papakinggan mo, Yahweh, ang dalangin ng mga hamak, patatatagin mo ang loob ng mga kapus-palad.

¹⁸Ipagtatanggol mo ang mga api at mga ulila, upang wala nang taong mananakot ng kapwa.