Read Magandang Balita Biblia Mga Awit 111 Bible Online

Mga Awit 111 - Magandang Balita Biblia bible

Mga Awit 111

¹Purihin si Yahweh! Buong puso siyang pasasalamatan, aking pupurihin sa gitna ng bayan kasama ng mga lingkod na hinirang.

²Ang mga gawa ni Yahweh, tunay napakadakila, mga nalulugod sa kanya, lagi itong inaalala;

³lahat niyang gawa'y dakila at wagas, katuwiran niya'y hindi magwawakas.

⁴Hindi maaalis sa ating gunita, si Yahweh ay mabuti't mahabaging lubha.

⁵Ang sa kanya'y gumagalang pagkain ay sagana; pangako ni Yahweh ay di nasisira.

⁶Ipinadama niya sa mga hinirang, ang kapangyarihan niyang tinataglay, nang ibigay niya lupa ng dayuhan.

⁷Ang gawa ng Diyos, matuwid at tapat, at maaasahan lahat niyang batas.

⁸Ito ay lalagi at di magwawakas, pagkat ang saliga'y totoo't matapat.

⁹Kaligtasa'y dulot sa mga hinirang, may ipinangakong walang hanggang tipan; Banal at dakila ang kanyang pangalan!

¹⁰Ang pagsunod at paggalang kay Yahweh'y simula ng karunungan. Taong masunurin, pupurihing lubos. Purihin ang Diyos magpakailanman!