Read Magandang Balita Biblia Mga Awit 122 Bible Online

Mga Awit 122 - Magandang Balita Biblia bible

Mga Awit 122

¹Isang Awit ng Pag-akyat upang Sumamba; katha ni David. Ako ay nagalak nang sabihin nila: “Pumunta na tayo sa bahay ni Yahweh.”

²Sama-sama kami matapos sapitin, ang pintuang-lunsod nitong Jerusalem.

³Itong Jerusalem ay napakaganda, matatag at maayos na lunsod siya.

⁴Dito umaahon ang lahat ng angkan, lipi ni Israel upang manambahan, ang hangad, si Yahweh ay pasalamatan, pagkat ito'y utos na dapat gampanan.

⁵Doon din naroon ang mga hukuman at trono ng haring hahatol sa tanan.

⁶Ang kapayapaan nitong Jerusalem, sikaping kay Yahweh ito'y idalangin: “Ang nangagmamahal sa iyo'y pagpalain.

⁷Pumayapa nawa ang banal na bayan, at ang palasyo mo ay maging tiwasay.”

⁸Alang-alang sa kasama at pamilya ko, sa iyo Jerusalem, ang sabi ko'y ito: “Ang kapayapaa'y laging sumaiyo.”

⁹Dahilan sa bahay ni Yahweh, ating Diyos, ang aking dalangi'y umunlad kang lubos.