Read Magandang Balita Biblia Mga Awit 124 Bible Online

Mga Awit 124 - Magandang Balita Biblia bible

Mga Awit 124

¹Isang Awit ng Pag-akyat upang Sumamba; katha ni David. Ano kaya't kung si Yahweh ay di pumanig sa atin; O Israel, ano kaya yaong iyong sasabihin?

²“Kung ang Diyos na si Yahweh, sa amin ay di pumanig, noong kami'y salakayin ng kaaway na malupit,

³maaaring kami noon ay nilamon na nang buháy sa silakbo ng damdamin at ng galit na sukdulan.

⁴Maaaring kami noo'y natangay na niyong agos, naanod sa karagata't tuluy-tuloy na nalunod;

⁵sa lakas ng agos noo'y nalunod nga kaming lubos.

⁶Tayo ay magpasalamat, si Yahweh ay papurihan, pagkat tayo'y iniligtas sa malupit na kaaway.

⁷Ang katulad nati'y ibong sa bitag ay nakatakas; lubos tayong nakalaya nang ang bitag ay mawasak.

⁸Tulong nating kailangan ay kay Yahweh nagmumula, pagkat itong lupa't langit tanging siya ang lumikha.