Read Magandang Balita Biblia Mga Awit 140 Bible Online

Mga Awit 140 - Magandang Balita Biblia bible

Mga Awit 140

¹Isang Awit na katha ni David upang awitin ng Punong Mang-aawit. Sa mga masama ako ay iligtas, iligtas mo, Yahweh, sa mga marahas;

²sila'y nagpaplano at kanilang hangad palaging mag-away, magkagulo lahat.

³Mabagsik ang dila na tulad ng ahas, tulad ng ulupong, taglay na kamandag. (Selah)[110]

⁴Sa mga masama ako ay iligtas; iligtas mo, Yahweh, sa mga marahas, na ang nilalayon ako ay ibagsak.

⁵Taong mga hambog, ang gusto sa akin, ako ay masilo, sa bitag hulihin, sa bitag na umang sa aking landasin. (Selah)[111]

⁶Sabi ko kay Yahweh, “Ikaw ang aking Diyos.” Kaya ako'y dinggin sa aking pagdulog.

⁷Panginoong Yahweh, na Tagapagligtas, nang ako'y lusubin, ikaw ang nag-ingat.

⁸Taong masasama, sa kanilang hangad ay iyong hadlangan, biguin mo agad. (Selah)[112]

⁹Ang mga kaaway, huwag pagtagumpayin, pagdusahin sila sa banta sa akin.

¹⁰Bagsakan mo sila ng apoy na baga, itapon sa hukay nang di makaalsa.

¹¹At ang mga taong gawai'y mangutya, huwag pagtagumpayin sa kanilang nasa; ang marahas nama'y bayaang mapuksa.

¹²Batid ko, O Yahweh, iyong papanigan ang mga mahirap, upang isanggalang, at pananatilihin ang katarungan.

¹³Ang mga matuwid magpupuring tunay, ika'y pupurihi't sa iyo mananahan!