Read Magandang Balita Biblia Mga Awit 144 Bible Online

Mga Awit 144 - Magandang Balita Biblia bible

Mga Awit 144

¹Katha ni David. Purihin si Yahweh na aking kanlungan, sa pakikibaka, ako ay sinanay; inihanda ako, upang makilaban.

²Matibay kong muog at Tagapagligtas, at aking tahanang hindi matitinag; Tagapagligtas kong pinapanaligan, nilulupig niya sakop kong mga bayan.

³O Yahweh, ano nga ba naman ang tao? At pinagtutuunan mo siya ng pansin?

⁴Katulad ay ulap na tangay ng hangin, napaparam siya na tulad ng lilim.

⁵Langit mong tahanan ay iyong hubugin, Yahweh, lisanin mo't bumabâ sa amin; mga kabundukan ay iyong yanigin, lalabas ang usok, aming mapapansin.

⁶Ang maraming kidlat ay iyong suguin, lahat ng kaaway iyong pakalatin; sa pagtakas nila ay iyong tudlain!

⁷Abutin mo ako at iyong itaas, sa kalalimang tubig ako ay iligtas; ipagsanggalang mo't nang di mapahamak sa mga dayuhang may taglay na lakas,

⁸ubod sinungaling na walang katulad, kahit ang pangako'y pandarayang lahat.

⁹O Diyos, may awitin akong bagung-bago, alpa'y tutugtugin at aawit ako.

¹⁰Tagumpay ng hari ay iyong kaloob, at iniligtas mo si David mong lingkod.

¹¹Iligtas mo ako sa mga malupit kong kaaway; sa kapangyarihan ng mga banyaga ay ipagsanggalang; sila'y sinungaling, di maaasahan, kahit may pangako at mga sumpaan.

¹²Nawa ang ating mga kabataan lumaking matatag tulad ng halaman. Ang kadalagaha'y magandang disenyo, kahit saang sulok ng isang palasyo.

¹³At nawa'y mapuno, mga kamalig natin ng lahat ng uri ng mga pagkain; at ang mga tupa'y magpalaanakin, sampu-sampung libo, ito'y paramihin.

¹⁴Mga kawan natin, sana'y dumami rin at huwag malagas ang kanilang supling; sa ating lansangan, sana'y mawala na ang mga panaghoy ng lungkot at dusa!

¹⁵Mapalad ang bansang kanyang pinagpala. Mapalad ang bayang si Yahweh'y Diyos na dinadakila!