Read Magandang Balita Biblia Mga Awit 146 Bible Online

Mga Awit 146 - Magandang Balita Biblia bible

Mga Awit 146

¹Purihin si Yahweh! Purihin mo si Yahweh, O aking kaluluwa!

²Pupurihin siya't aking aawitan; aking aawitan habang ako'y buháy.

³Sa mga pangulo'y huwag kang manghahawak, kahit sa kaninong di makapagligtas;

⁴kung sila'y mamatay, balik sa alabok, kahit anong plano nila'y natatapos.

⁵Mapalad ang tao, na ang kanyang Diyos na laging katulong ay ang Diyos ni Jacob; sa Diyos na si Yahweh, umaasang lubos,

⁶sa Diyos na lumikha niyong kalangitan, ng lupa at dagat, at lahat ng bagay. Ang kanyang pangako ay maaasahan.

⁷Panig sa naaapi, kung siya'y humatol, may pagkaing handa, sa nangagugutom. Pinalaya niya ang mga nabihag;

⁸isinasauli, paningin ng bulag; lahat ng inapi ay itinataas, ang mga hinirang niya'y nililingap.

⁹Isinasanggalang ang mga dayuhang sa lupain nila'y doon tumatahan; tumutulong siya sa balo't ulila, ngunit sa masama'y parusa'ng hatid niya.

¹⁰Walang hanggang Hari, ang Diyos na si Yahweh! Ang Diyos mo, Zion, ay mananatili! Purihin si Yahweh!