Read Magandang Balita Biblia Mga Awit 25 Bible Online

Mga Awit 25 - Magandang Balita Biblia bible

Mga Awit 25

¹Katha ni David. Sa iyo, Yahweh, dalangin ko'y ipinapaabot;

²sa iyo, O Diyos, ako'y tiwalang lubos. Huwag hayaang malagay ako sa kahihiyan, at pagtawanan ako ng aking mga kaaway!

³Mga may tiwala sa iyo'y huwag malagay sa kahihiyan, at ang mga taksil sa iyo'y magdanas ng kasawian.

⁴Ituro mo sa akin, Yahweh, ang iyong kalooban, at ang iyong landas, sa akin ay ipaalam.

⁵Turuan mo akong mamuhay ayon sa katotohanan, sapagkat ikaw ang Diyos ng aking kaligtasan; sa buong maghapo'y ikaw ang inaasahan.

⁶Alalahanin mo, Yahweh, ang pag-ibig mong wagas, na ipinakita mo na noong panahong lumipas.

⁷Patawarin mo ako sa aking mga kasalanan, sa mga kamalian ko noong aking kabataan; ayon sa pag-ibig mong walang katapusan, ako sana, Yahweh, ay huwag kalimutan!

⁸Si Yahweh ay mabuti at siya'y makatarungan, itinuturo niya sa makasalanan ang tamang daan.

⁹Sa mapagpakumbaba siya ang gumagabay, sa kanyang kalooban kanyang inaakay.

¹⁰Tapat ang pag-ibig, siya ang patnubay, sa lahat ng mga taong sumusunod, sa utos at tipan siya'ng sumusubaybay.

¹¹Ang iyong pangako, Yahweh, sana'y tuparin, ang marami kong sala'y iyong patawarin.

¹²Ang taong kay Yahweh ay gumagalang, matututo ng landas na dapat niyang lakaran.

¹³Ang buhay nila'y palaging sasagana, mga anak nila'y magmamana sa lupa.

¹⁴Sa mga masunurin, si Yahweh'y isang kaibigan, ipinapaunawa niya sa kanila, kanyang kasunduan.

¹⁵Si Yahweh lang ang laging inaasahan, na magliligtas sa akin sa kapahamakan.

¹⁶Lingapin mo ako, at ako'y kahabagan, pagkat nangungulila at nanlulupaypay.

¹⁷Pagaanin mo ang aking mga pasanin, mga gulo sa buhay ko'y iyong payapain.

¹⁸Alalahanin mo ang hirap ko at suliranin, at lahat ng sala ko ay iyong patawarin.

¹⁹Tingnan mo't napakarami ng aking kaaway, at labis nila akong kinamumuhian!

²⁰Ipagtanggol mo ako't iligtas ang aking buhay, huwag tulutang ako'y malagay sa kahihiyan, pagkat kaligtasan ko'y sa iyo nakasalalay.

²¹Iligtas nawa ako ng kabutihan ko't katapatan, sapagkat ikaw ang aking pinagtitiwalaan.

²²Hanguin mo, O Diyos, ang bayang Israel, sa kanilang kaguluhan at mga suliranin!