Read Magandang Balita Biblia Mga Awit 26 Bible Online

Mga Awit 26 - Magandang Balita Biblia bible

Mga Awit 26

¹Katha ni David. Ipahayag mo ako, Yahweh, na walang sala, pagkat ako'y matuwid at sa iyo'y lubos na umaasa.

²Yahweh, ako'y siyasatin mo at subukin, hatulan mo ang iniisip at ang aking hangarin.

³Pag-ibig mong wagas ang aking patnubay, ang iyong katapatan ang lagi kong kaagapay.

⁴Di ako nakikisama sa walang kuwentang tao, hindi ako nakikiisa sa mga hipokrito.

⁵Ang nakikisama sa kanila ay aking kinamumuhian, at ang makihalo sa kanila'y aking iniiwasan.

⁶Kamay ko'y malinis pagkat ako'y walang kasalanan, ako'y lumalakad, Yahweh, sa paligid ng iyong altar.

⁷Awit ng pasasalamat ay aking inaawit, gawa mong kahanga-hanga, ay aking sinasambit.

⁸Mahal ko, Yahweh, ang Templo mong tahanan, sapagkat naroroon ang iyong kaluwalhatian.

⁹Sa parusa ng masasama, huwag mo akong idamay, ilayo rin sa parusa ng mahihilig sa pagpatay—

¹⁰mga taong walang magawâ kundi kasamaan, at palaging naghihintay na sila ay suhulan.

¹¹Ngunit para sa akin, gagawin ko ang tama, kaya iligtas mo ako at sa akin ay maawa.

¹²Ako ay ligtas sa lahat ng kapahamakan; pupurihin ko si Yahweh sa gitna ng kapulungan!