Read Magandang Balita Biblia Mga Awit 33 Bible Online

Mga Awit 33 - Magandang Balita Biblia bible

Mga Awit 33

¹Lahat ng matuwid dapat na magsaya, dahil sa ginawa ng Diyos sa kanila; kayong masunuri'y magpuri sa kanya!

²Ang Diyos na si Yahweh ay pasalamatan, tugtugin ang alpa't awit ay saliwan;

³Isang bagong awit, awiting malakas, kasaliw ang tugtog ng alpang marilag!

⁴Si Yahweh ay tapat sa kanyang salita, at maaasahan ang kanyang ginawa.

⁵Ang nais niya ay kat'wira't katarungan, ang pag-ibig niya sa mundo'y laganap.

⁶Sa utos ni Yahweh, nalikha ang langit, ang araw, ang buwa't talang maririkit;

⁷sa iisang dako, tubig ay tinipon, at sa kalaliman ay doon kinulong.

⁸Matakot kay Yahweh ang lahat sa lupa! Dapat katakutan ng buong nilikha!

⁹Ang buong daigdig, kanyang nilikha, sa kanyang salita, lumitaw na kusa.

¹⁰Ang binabalangkas niyong mga bansa, kanyang nababago't winawalang-bisa.

¹¹Ngunit ang mga panukala ni Yahweh, hindi masisira, ito'y mananatili.

¹²Mapalad ang bansang si Yahweh ang Diyos; mapalad ang bayang kanyang ibinukod.

¹³Magmula sa langit, kanyang minamasdan ang lahat ng tao na kanyang nilalang.

¹⁴Nagmamasid siya at namamahala sa lahat ng tao sa balat ng lupa.

¹⁵Ang isip nila'y sa kanya nagmula walang nalilingid sa kanilang gawa.

¹⁶Di dahil sa hukbo, hari'y nagtagumpay, ni dahil sa lakas, nagwagi ang kawal;

¹⁷kabayong pandigma'y di na kailangan, upang sa digmaa'y kamtin ang tagumpay; di makakapagligtas, lakas nilang taglay.

¹⁸Ang nagmamahal kay Yahweh, at nagtitiwala sa kanyang pag-ibig, ay kinakalinga.

¹⁹Hindi hahayaang sila ay mamatay, kahit magtaggutom sila'y binubuhay.

²⁰Tanging si Yahweh lang ang ating pag-asa; tulong na malaki at sanggalang siya.

²¹Dahil nga sa kanya, kami'y natutuwa; sa kanyang pangalan ay nagtitiwala.

²²Ipagkaloob mo na aming makamit, O Yahweh, ang iyong wagas na pag-ibig, yamang ang pag-asa'y sa iyo nasasalig!