Read Magandang Balita Biblia Mga Awit 38 Bible Online

Mga Awit 38 - Magandang Balita Biblia bible

Mga Awit 38

¹Awit ni David; inaawit tuwing mag-aalay ng handog pang-alaala. Yahweh, huwag mo po akong kagalitan! O kung galit ka ma'y huwag pong parusahan.

²Ang iyong palaso'y tumama sa akin; at iyong mga kamay, hinampas sa akin.

³Ako'y nilalagnat dahil sa iyong galit; dahil sa sala ko, ako'y nagkasakit.

⁴Ako'y nalulunod sa taglay kong sala, sa dinami-rami ay para nang baha; mabigat na lubha itong aking dala.

⁵Malabis ang paglala nitong aking sugat, dahil ginawa ko ang hindi nararapat;

⁶Wasak at kuba na ang aking katawan; sa buong maghapo'y puspos ng kalungkutan.

⁷Dumapong lagnat ko'y apoy na sa init, lumulubhang lalo ang taglay kong sakit.

⁸Ako'y nanghihina at nanlulupaypay, puso'y dumaraing sa sakit na taglay.

⁹O Yahweh, hangad ko'y iyong nababatid; ang mga daing ko'y iyong dinirinig.

¹⁰Ang aking puso ay mabilis ang tibok, ang taglay kong lakas, pumapanaw na halos; ningning ng mata ko'y pawa nang naubos.

¹¹Mga kaibiga't mga kapitbahay ay nagsisilayo, ayaw nang dumalaw dahil sa sugat ko sa aking katawan; lumalayo pati aking sambahayan.

¹²Silang nagnanais na ako'y patayin, nag-umang ng bitag upang ako'y dakpin; ang may bantang ako'y saktan at wasakin, maghapon kung sila'y mag-abang sa akin.

¹³Para akong bingi na di makarinig, at para ring pipi na di makaimik;

¹⁴sa pagsasanggalang ay walang masabi, walang marinig katulad ng isang bingi.

¹⁵Ngunit sa iyo, Yahweh, ako'y may tiwala, aking Diyos, ika'y tiyak na tutugon.

¹⁶Aking panalangin, iyong pakinggan, itong mga hambog, huwag mong hayaan, sa aking kabiguan, sila'y magtawanan.

¹⁷Sa pakiramdam ko, ako'y mabubuwal, mahapdi't makirot ang aking katawan.

¹⁸Aking ihahayag ang kasalanan ko, mga kasalanang sa aki'y gumugulo.

¹⁹Mga kaaway ko'y malakas, masigla; wala mang dahila'y namumuhi sila.

²⁰Ang ganting masama ang sukli sa akin, dahil sa hangad kong buhay ko'y tuwirin.

²¹Yahweh, huwag akong iiwan; maawaing Diyos, huwag akong layuan;

²²aking Panginoon, aking kaligtasan, iyo ngang dalian, ako ay tulungan!