Read Magandang Balita Biblia Mga Awit 46 Bible Online

Mga Awit 46 - Magandang Balita Biblia bible

Mga Awit 46

¹Katha ng angkan ni Korah upang awitin ng Punong Mang-aawit: ayon sa Alamot[32] Ang Diyos ang ating lakas at kanlungan, at handang saklolo kung may kaguluhan.

²Di dapat matakot, mundo'y mayanig man, kahit na sa dagat ang bundok matangay;

³kahit na magngalit yaong karagatan, at ang mga burol mayanig, magimbal. (Selah)[33]

⁴May ilog ng galak sa bayan ng Diyos, sa banal na templo'y ligaya ang dulot.

⁵Ang tahanang-lunsod ay di masisira; ito ang tahanan ng Diyos na Dakila, mula sa umaga ay kanyang alaga.

⁶Nangingilabot din bansa't kaharian, sa tinig ng Diyos lupa'y napaparam.

⁷Nasa atin ang Diyos na Makapangyarihan, ang Diyos ni Jacob na ating kanlungan. (Selah)[34]

⁸Anuman ang kanyang ginawa sa lupa, sapat nang pagmasdan at ika'y hahanga!

⁹Maging pagbabaka ay napatitigil, sibat at palaso'y madaling sirain; baluting sanggalang ay kayang tupukin!

¹⁰Sinasabi niya, “Ihinto ang labanan, ako ang Diyos, dapat ninyong malaman, kataas-taasan sa lahat ng bansa, sa buong sanlibuta'y pinakadakila.”

¹¹Nasa atin ang Diyos na Makapangyarihan; ang Diyos ni Jacob na ating kanlungan! (Selah)[35]