Read Magandang Balita Biblia Mga Awit 58 Bible Online

Mga Awit 58 - Magandang Balita Biblia bible

Mga Awit 58

¹Katha ni David upang awitin ng Punong Mang-aawit: ayon sa tono ng “Huwag Mong Sirain”. Isang Miktam.[54] Tama ba ang hatol ng mga pinuno? Ang hatol ba ninyo'y pantay at totoo?

²Hindi! Pagkat ang inyong binabalangkas pawang karahasa't gawaing di tama.

³Iyang masasama sa mula't mula pa, mula sa pagsilang ay sinungaling na.

⁴Sila'y makamandag, ahas ang kaparis, katulad ay kobrang ang tainga ay may takip;

⁵itong mga tawak at salamangkero, di niya dinirinig, hindi pansin ito.

⁶Bungiin ang ngipin nila, O Panginoon, alisin ang pangil niyong mga leon.

⁷Itapon mo silang katulad ng tubig, sa daa'y duruging parang mga yagit.

⁸Parang mga susô, sa dumi magwakas, batang di nabuhay sa sangmaliwanag.

⁹Puputulin silang hindi nila batid, itatapon ng Diyos sa tindi ng galit; bagaman buháy pa'y iyon na ang sinapit.

¹⁰Ang mga matuwid nama'y magagalak kung ang masasama'y parusahang ganap; pagkakita nila sa dugong dumanak, hindi mangingiming doon na tumahak.

¹¹Saka sasabihin ng mga nilalang, “Ang mga matuwid ay gantimpalaan; tunay ngang may Diyos, na hukom ng lahat!”