Read Magandang Balita Biblia Mga Awit 66 Bible Online

Mga Awit 66 - Magandang Balita Biblia bible

Mga Awit 66

¹Isang Awit na kinatha para sa Punong Mang-aawit. Sumigaw sa galak ang mga nilalang!

²At purihin ang Diyos na may kagalakan; wagas na papuri sa kanya'y ibigay! Awitan siya't luwalhatiin siya!

³Ito ang sabihin sa Diyos na Dakila: “Ang mga gawa mo ay kahanga-hanga; yuyuko sa takot ang mga kaaway, dahilan sa taglay mong kapangyarihan.

⁴Ang lahat sa lupa ika'y sinasamba, awit ng papuri yaong kinakanta; ang iyong pangala'y pinupuri nila.” (Selah)[63]

⁵Ang ginawa ng Diyos, lapit at pagmasdan, ang kahanga-hangang ginawa sa tanan.

⁶Naging tuyong lupa kahit na karagatan, mga ninuno nati'y doon dumaan; doo'y naramdaman labis na kagalakan.

⁷Makapangyarihang hari kailanman, siya'y nagmamasid magpakailanman; kaya huwag magtatangkang sa kanya'y lumaban. (Selah)[64]

⁸Ang lahat ng bansa'y magpuri sa Diyos, inyong iparinig papuring malugod.

⁹Iningatan niya tayong pawang buháy, di tayo bumagsak, di niya binayaan!

¹⁰O Diyos, sinubok mo ang iyong mga hirang, sinubok mo kami upang dumalisay; at tulad ng pilak, kami'y idinarang.

¹¹Iyong binayaang mahulog sa bitag, at pinagdala mo kami nang mabigat.

¹²Sa mga kaaway ipinaubaya, sinubok mo kami sa apoy at baha, bago mo dinala sa dakong payapa.

¹³Ako'y maghahandog sa banal mong templo ng aking pangako na handog sa iyo.

¹⁴Pati pangako ko, nang may suliranin, ay ibibigay ko, sa iyo dadalhin.

¹⁵Natatanging handog ang iaalay ko; susunuging tupa, kambing, saka toro, mababangong samyo, halimuyak nito. (Selah)[65]

¹⁶Lapit at makinig, ang nagpaparangal sa Diyos, at sa inyo'y aking isasaysay ang kanyang ginawang mga kabutihan.

¹⁷Ako ay tumawag, sa Diyos ay nagpuri, kanyang karangalan, aking sinasabi.

¹⁸Kung sa kasalanan ako'y magpatuloy, di sana ako dininig ng ating Panginoon.

¹⁹Ngunit tunay akong dininig ng Diyos, sa aking dalangin, ako ay sinagot.

²⁰Purihin ang Diyos! Siya'y papurihan, pagkat ang daing ko'y kanyang pinakinggan, at ang pag-ibig niya sa aki'y walang katapusan.