Read Magandang Balita Biblia Mga Awit 7 Bible Online

Mga Awit 7 - Magandang Balita Biblia bible

Mga Awit 7

¹Shigaion[7] ni David na kanyang inawit kay Yahweh; patungkol kay Cus, na isang Benjaminita. O Yahweh, aking Diyos, sa iyo ako lumalapit, iligtas mo ako sa mga taong sa aki'y tumutugis,

²kundi, sila'y parang leon na lalapa sa akin kung walang magliligtas, ako nga ay papatayin.

³O Yahweh, aking Diyos, kung ako ma'y nagkasala, at kung aking mga kamay ay puminsala sa iba,

⁴kung ako ay naging taksil sa tapat kong kaibigan, kung ako po'y naminsala o nang-api ng kaaway,

⁵payag akong hulihin, patayin kung kailangan, iwan akong walang buhay at sa lupa'y mahandusay. (Selah)[8]

⁶O Yahweh, bumangon ka, puksain mo ang kaaway, ako'y iyong ipagtanggol sa malupit nilang kamay! Gumising ka't sagipin mo, ako ngayon ay tulungan, dahil ang hangad mo'y maghari ang katarungan.

⁷Tipunin mo sa iyong piling ang lahat ng mga bansa, at mula sa trono sa kaitaasan, ikaw, Yahweh, ang mamahala.

⁸Sa lahat ng mga bayan, ikaw ang hukom na dakila, humatol ka sa panig ko sapagkat ako'y taong tapat.

⁹Ikaw ay isang Diyos na matuwid, batid mo ang aming damdamin at pag-iisip; sugpuin mo ang gawain ng masasama, at ang mabubuti'y bigyan mo ng gantimpala.

¹⁰Ang Diyos ang aking sanggalang; inililigtas niya ang may pusong makatarungan.

¹¹Ang Diyos ay isang hukom na makatarungan, at nagpaparusa sa masama sa bawat araw.

¹²Kung di sila magbabago sa masasama nilang gawa, ang tabak ng Diyos ay kanyang ihahasa; pati ang kanyang pana ay kanyang ihahanda.

¹³Mga pamatay na sandata ay kanyang itatakda, kanya ring iuumang ang mga palasong nagbabaga.

¹⁴Pagmasdan mo ang masama, sa baluktot niyang isip, ipinaglilihi niya ang kalokohan at ipinanganganak niya ang kasamaan.

¹⁵Humuhukay ng patibong para sa ibang tao, subalit siya rin mismo ang nahuhulog dito.

¹⁶Siya rin ang may gawa sa parusang tinatanggap, sa sariling karahasan, siya ngayo'y naghihirap.

¹⁷Pasasalamatan ko si Yahweh sa kanyang katarungan, aawitan ko ng papuri ang Kataas-taasan niyang ngalan.