Read Magandang Balita Biblia Mga Awit 73 Bible Online

Mga Awit 73 - Magandang Balita Biblia bible

Mga Awit 73

¹Awit ni Asaf. Kay buti ng Diyos sa taong matuwid, sa lahat ng taong ang puso'y malinis.

²Ngunit ang sarili'y halos bumagsak, sa paghakbang ko'y muntik nang madulas!

³Sa taong mayabang, ako'y naiinggit nga, at sa biglang yaman ng mga masama.

⁴Ni hindi nagdanas ng anumang hirap, sila'y masisigla't katawa'y malakas.

⁵Di tulad ng ibang naghirap nang labis, di nila dinanas ang buhay na gipit.

⁶Ang pagmamalaki ay kinukuwintas, at ang dinaramit nila'y pandarahas.

⁷Ang tibok ng puso'y pawang kasamaan, at masasama rin ang nasa isipan;

⁸mga ibang tao'y pinagtatawanan, ang yayabang nila, ang layon sa buhay ay ang pang-aapi sa kapwa nilalang.

⁹Diyos mang nasa langit ay tinutungayaw, labis kung mag-utos sa mga nilalang;

¹⁰kaya sumusunod pati lingkod ng Diyos, anumang sabihi'y paniwalang lubos.

¹¹Ang sabi, “Ang Diyos walang nalalaman, walang malay yaong Kataas-taasan.”

¹²Ang mga masama'y ito ang kagaya, di na kinukulang ay naghahanap pa.

¹³Samantalang ako, malinis ang palad, hindi nagkasala't lubos na nag-ingat, at aking natamo'y kabiguang lahat.

¹⁴Diyos, pinagtiis mo ako ng hirap, sa tuwing umaga'y parusa ang gawad.

¹⁵Kung ang mga ito'y aking sasabihin, sa mga lingkod mo, ako'y magtataksil;

¹⁶kaya't sinikap kong ito'y saliksikin, mahirap-hirap mang ito'y unawain.

¹⁷Gayunman, sa templo'y doon ko natuklas, na ang masasama ay mapapahamak;

¹⁸dinala mo sila sa dakong madulas, upang malubos na, kanilang pagbagsak;

¹⁹walang abug-abog sila ay nawasak, kakila-kilabot yaong naging wakas!

²⁰Parang panaginip nang ako'y magising, pati anyo nila'y nalimutan na rin.

²¹Nang ang aking isip hindi mapalagay, at ang damdamin ko'y labis na nasaktan,

²²di ko maunawa, para akong tanga, sa iyong harapa'y hayop ang kagaya.

²³Gayon pa ma'y sinasamahan mo ako, sa aking paglakad ay inaakay mo.

²⁴Ang mga payo mo'y umakay sa akin, marangal na ako'y iyong tatanggapin.

²⁵Sino pa sa langit, kundi ikaw lamang, at maging sa lupa'y, aking kailangan?

²⁶Puso ko't kaluluwa kung nanghihina man, ang Diyos ang lakas kong tanging kailangan.

²⁷Yaong hihiwalay sa iyo'y mamamatay, at ang nagtataksil wawasaking tunay.

²⁸Ngunit sa sarili, tanging hangarin ko, sa piling ng Diyos manatili ako! Sa piling ng Panginoong Yahweh, ako'y mapanatag, ang kanyang ginawa'y aking ihahayag.