Read Magandang Balita Biblia Mga Awit 81 Bible Online

Mga Awit 81 - Magandang Balita Biblia bible

Mga Awit 81

¹Katha ni Asaf upang awitin ng Punong Mang-aawit: ayon sa Gittith.[82] Masiglang awitan ang Tagapagligtas, itong Diyos ni Jacob, awitang may galak.

²Umawit sa saliw ng mga tamburin, kasabay ng tugtog ng lira at alpa.

³Hipan ang trumpeta tuwing nagdiriwang, kung buwan ay bago't nasa kabilugan.

⁴Pagkat sa Israel, ito'y isang utos, batas na ginawa ng Diyos ni Jacob.

⁵Sa mga hinirang, ang utos di'y ito nang sila'y ilabas sa bansang Egipto. Ganito ang wika na aking narinig:

⁶“Mabigat mong dala'y aking inaalis, ikaw ay iibsan sa pasan mong labis.

⁷Iniligtas kita sa gitna ng hirap, sinaklolohan ka nang ika'y tumawag; tinugon din kita sa gitna ng kidlat, at sinubok kita sa Batis Meriba. (Selah)[83]

⁸Kapag nangungusap, ako'y inyong dinggin, sana'y makinig ka, O bansang Israel.

⁹Ang diyus-diyosa'y huwag mong paglingkuran, diyos ng ibang bansa'y di dapat yukuran.

¹⁰Ako ay si Yahweh, ako ang Diyos mo, ako ang tumubos sa iyo sa Egipto; pagkaing gustuhin ibibigay ko sa iyo.

¹¹“Ngunit ang bayan ko'y hindi ako pansin, di ako sinunod ng bayang Israel,

¹²sa tigas ng puso, aking hinayaang ang sarili nilang gusto'y siyang sundan.

¹³Ang tangi kong hangad, sana ako'y sundin, sundin ang utos ko ng bayang Israel;

¹⁴ang kaaway nila'y aking lulupigin, lahat ng kaaway agad lilipulin.

¹⁵Silang namumuhi't sa aki'y napopoot, ay magsisiyuko sa laki ng takot, ang parusa nila'y walang pagkatapos.

¹⁶Ngunit ang mabuting bunga nitong trigo, ang siyang sa inyo'y ipapakain ko; at ang gusto ninyong masarap na pulot, ang siyang sa inyo'y aking idudulot.”