Read Magandang Balita Biblia Mga Kawikaan 17 Bible Online

Mga Kawikaan 17 - Magandang Balita Biblia bible

Mga Kawikaan 17

¹Kahit tinapay ang kinakain ngunit may kapayapaan, mabuting di hamak kaysa malaki ngunit magulong handaan.

²Ang tusong alipin ay makakahati pa sa mamanahin, ng anak ng kanyang amo kung ito'y inutil.

³Dinadalisay sa apoy ang ginto at pilak, ngunit sa puso ng tao'y si Yahweh ang sumisiyasat.

⁴Ang taong masama ay nakikinig sa payo ng masama, at ang sinungaling ay sumusunod sa baluktot na dila.

⁵Ang nanlalait sa mahirap ay humahamak sa Maykapal, at ang nagagalak sa kapahamakan ng iba'y mayroon ding pananagutan.

⁶Ang mga apo ay putong ng katandaan; ang karangalan ng mga anak ay ang kanilang magulang.

⁷Ang pinong pananalita ay di mahahanap sa mangmang, ni ang kasinungalingan sa taong marangal.

⁸Sa paniwala ng iba ang suhol ay parang salamangka; kaya lahat ay makukuha kung may pansuhol ka.

⁹Ang pagpapatawad sa kapwa ay nagpapasarap sa samahan, ngunit ang pagkakalat ng kahinaan ay sumisira ng pagkakaibigan.

¹⁰Ang matalino'y natututo sa isang salita ngunit ang mangmang ay hindi, hampasin mang walang awa.

¹¹Ang nais ng masama'y paghihimagsik, kaya ipadadala sa kanya'y isang sugong malupit.

¹²Mabuti pang harapin ang inahing osong inagawan ng anak kaysa kausapin ang isang mangmang na lublob sa kahangalan.

¹³Kapag masama ang iginanti sa mabuting ginawa, ang kapahamakan sa buhay ay di mawawala.

¹⁴Ang simula ng kaguluha'y parang butas sa isang dike; na dapat ay sarhan bago ito lumaki.

¹⁵Ang humahatol sa walang kasalanan at ang umaayon sa kasamaan, kay Yahweh ay kapwa kasuklam-suklam.

¹⁶Walang katuturan ang gumugol para sa pag-aaral, ng isang taong pumili na siya'y maging mangmang.

¹⁷Ang kaibigan ay nagmamahal sa lahat ng panahon, at sa oras ng kagipita'y kapatid na tumutulong.

¹⁸Ang mangangakong magbayad para sa utang ng iba, kamangmangang maituturing ang kanyang ginagawa.

¹⁹Ang umiibig sa kaguluhan ay umiibig sa kasalanan; at ang mayayabang ay naghahanap ng kapahamakan.

²⁰Ang masamang isipan ay hindi uunlad, ang sinungaling ay aabot sa kasawiang-palad.

²¹Ang mga magulang ng anak na mangmang, sakit sa damdamin ang nararanasan.

²²Ang pagkamasayahin ay mabuti sa katawan, at ang malungkuti'y unti-unting namamatay.

²³Ang katarungan ay hindi nakakamtan, kung itong masama, suhol ay patulan.

²⁴Karunungan ang pangarap ng taong may unawa, ngunit ang isip ng mangmang ay pagala-gala.

²⁵Ang hangal na anak ay problema ng kanyang ama at pabigat sa damdamin ng kanyang ina.

²⁶Ang pagpaparusa sa matuwid ay hindi makatuwiran, maging ang pagpapahirap sa taong buhay marangal.

²⁷Nagtataglay ng kaalaman ang maingat magsalita, ang mahinahon ay taong may pagkaunawa.

²⁸Ang mangmang na hindi madaldal ay iisiping marunong; kung hindi siya masalita at ang bibig ay laging tikom.