Read Magandang Balita Biblia Mga Kawikaan 20 Bible Online

Mga Kawikaan 20 - Magandang Balita Biblia bible

Mga Kawikaan 20

¹Ang alak ay nagpapababa sa dangal ng isang tao, kaya isang kamangmangan ang magpakalulong dito.

²Ang poot ng hari ay parang leong umuungal, ang gumalit sa kanya'y nanganganib ang buhay.

³Ang marangal na tao'y umiiwas sa kaguluhan, ngunit ang gusto ng mangmang ay laging pag-aaway.

⁴Ang taong tamad sa panahon ng taniman ay walang magagapas pagdating ng anihan.

⁵Tulad ng tubig na malalim ang isipan ng isang tao, ngunit ito'y matatarok ng isang matalino.

⁶Sinasabi ng bawat isa na siya ay tapat, ngunit kahit kanino sa kanila'y hindi ka nakakatiyak.

⁷Kung ang isang ama'y namumuhay sa katuwiran, mapalad ang mga anak na siya ang tinutularan.

⁸Sa pagluklok ng hari upang igawad ang kahatulan, walang matatagong anumang kasamaan.

⁹Sino ang makakapagsabi na ang puso niya'y malinis at di namuhay sa kasamaan kahit isang saglit?

¹⁰Ang mandarayang timbangan at mandarayang sukatan, kay Yahweh ay parehong kasuklam-suklam.

¹¹Kahit ang bata ay makikilala sa kanyang mga gawa; makikita sa kanyang kilos kung siya ay tapat nga.

¹²Ang taingang nakakarinig at matang nakakakita, parehong si Yahweh ang siyang maylikha.

¹³Matulog ka nang matulog at ika'y maghihirap, ngunit maganda ang iyong bukas kung ika'y magsisikap.

¹⁴Ang sabi ng mamimili, “Ang presyo mo'y ubod taas.” Ngunit pagtalikod ay ipinamamalitang nakabarat.

¹⁵Ang taong nakakaalam ng kanyang sinasabi, daig pa ang may ginto at alahas na marami.

¹⁶Ang sinumang nananagot sa utang ng iba, dapat kunan ng ari-arian bilang garantiya.

¹⁷Anumang nakuha sa pandaraya ay parang masarap na pagkain, ngunit kapag tumagal ay para kang kumain ng buhangin.

¹⁸Ang mabuting payo ay kailangan para magtagumpay; kung hindi ka handa huwag nang pumalaot sa labanan.

¹⁹Ang lihim ay nahahayag dahil sa mga tsismis, kaya huwag kang makisama sa taong makati ang dila.

²⁰Sinumang magmura sa kanyang magulang, parang ilaw na walang ningas ang wakas ng kanyang buhay.

²¹Ang perang hindi pinaghirapan, kung gastusin ay walang hinayang.

²²Huwag mong gantihan ng masama ang masama; tutulungan ka ni Yahweh, sa kanya ka magtiwala.

²³Si Yahweh ay napopoot sa panukat na di tama, siya ay namumuhi sa timbangang may daya.

²⁴Si Yahweh lamang ang nagtatakda ng ating landasin; kaya huwag ipagyabang ang iyong lakbayin.

²⁵Bago mangako sa Diyos ay isiping mabuti, upang hindi ka magsisi sa bandang huli.

²⁶Malalaman ng haring matalino ang lahat ng gumagawa ng masama, at pagdating ng araw sila'y pinaparusahan nang walang awa.

²⁷Binigyan tayo ni Yahweh ng isipan at ng budhi, kaya't wala tayong maitatago kahit na sandali.

²⁸Ang haring tapat at makatarungan ay magtatagal sa kanyang luklukan.

²⁹Karangalan ng kabataan ang kanyang kalakasan, ang putong ng katandaan, buhok na panay uban.

³⁰Ang hampas na lumalatay ay lumilinis ng kasamaan, at ang palong nadarama'y humuhugas sa kalooban.