Read Magandang Balita Biblia Mga Kawikaan 21 Bible Online

Mga Kawikaan 21 - Magandang Balita Biblia bible

Mga Kawikaan 21

¹Hawak ni Yahweh ang isip ng isang hari at naibabaling niya ito kung saan igawi.

²Ang akala ng tao lahat ng kilos niya'y wasto, ngunit si Yahweh lang ang nakakasaliksik ng puso.

³Higit na kalugud-lugod kay Yahweh kaysa mga handog ang mga gawang makatuwiran at makatarungan.

⁴Ugaling mapangmata at pusong mapagyabang, ito ang siyang gabay ng mga makasalanan.

⁵Ang mabuting pagbabalak ay pinapakinabangan, ngunit ang dalus-dalos na paggawa'y walang kahihinatnan.

⁶Ang pagkakamal ng salapi dahil sa kadayaan ay maghahatid sa maagang kamatayan.

⁷Ang masama'y ipinapahamak ng sariling karahasan, pagkat ayaw gawin ang talagang katuwiran.

⁸Ang landas ng may sala ay paliku-liko, ngunit ang lakad ng matuwid ay laging wasto.

⁹Masarap pa ang tumira sa bubungan ng bahay kaysa sa loob ng bahay na ang kasama'y asawang madaldal.

¹⁰Ang isip ng masama'y lagi sa kalikuan, kahit na kanino'y walang pakundangan.

¹¹Parusahan mo ang mangungutya at matututo ang mangmang, pagsabihan mo ang matino, lalong lalawak ang kanyang kaalaman.

¹²Alam ng Diyos ang nangyayari sa loob ng bahay ng masama, at siya'y gumagawa ng paraan upang sila'y mapariwara.

¹³Ang hindi pumapansin sa daing ng mahirap, daraing din balang araw ngunit walang lilingap.

¹⁴Kung ang kapwa mo ay may hinanakit, regaluhan mo nang palihim, mawawala ang galit.

¹⁵Kapag umiiral ang katarungan, natutuwa ang matuwid, ngunit nalulungkot ang masama at may likong pag-iisip.

¹⁶Ang lumilihis sa daan ng kaalaman ay hahantong sa kamatayan.

¹⁷Ang taong maluho at mahilig sa alak ay di yayaman, bagkus sa hirap siya'y masasadlak.

¹⁸Ang masamang balak sa taong matuwid ay babalik sa liko ang pag-iisip.

¹⁹Mas mabuti ang mag-isang manirahan sa ilang kaysa makisama sa asawang madaldal at palaaway.

²⁰Ang bahay ng matalino'y napupuno ng kayamanan, ngunit lahat ay winawaldas ng taong mangmang.

²¹Ang lumalakad sa daan ng katuwiran at katapatan ay nagkakamit ng buhay at karangalan.

²²Ang matalinong pinuno ay makakapasok sa lunsod na may mga bantay, at kanyang maiguguho ang inaasahan nilang muog na matibay.

²³Ang pumipigil sa kanyang dila ay umiiwas sa masama.

²⁴Ang taong makasarili ay palalo at mapang-api.

²⁵Gutom ang papatay sa taong batugan, pagkat ayaw niyang ikilos ang kanyang mga kamay.

²⁶Ang taong tamad ay nanghihingi araw-araw, ngunit ang matuwid ay di nagsasawa ng kabibigay.

²⁷Ang handog ng masama ay kasuklam-suklam sa Diyos, lalo't ang layunin nito ay di kalugud-lugod.

²⁸Ang patotoo ng sinungaling ay di papakinggan, ngunit ang salita ng tapat ay pahahalagahan.

²⁹Alam ng matuwid ang kanyang hinaharap, di tulad ng masama, nagkukunwa, nagpapanggap.

³⁰Ang kaalaman ng tao, unawa o karunungan ay di makatutulong kung si Yahweh ay kalaban.

³¹Ang kabayo'y naihahanda para sa digmaan, ngunit tanging si Yahweh ang nagbibigay ng tagumpay.