Read Magandang Balita Biblia Mga Kawikaan 25 Bible Online

Mga Kawikaan 25 - Magandang Balita Biblia bible

Mga Kawikaan 25

¹Narito pa ang mga kawikaan ni Solomon; tinipon at kinopya ng mga tauhan ni Hezekias na hari ng Juda.

²Kaluwalhatian ng Diyos na balutin ng hiwaga ang lahat ng bagay, at karangalan naman ng hari na ito'y saliksikin.

³Isipan ng hari'y mahirap malaman, ito'y sintaas ng langit, sinlalim ng karagatan.

⁴Kapag ang pilak ay dalisay, may magagawa na ang panday.

⁵Kapag ang masamang tagapayo'y naalis sa paligid ng hari, ang katarungan ang mamamalagi.

⁶Huwag kang magmamataas sa harap ng hari, ni ihanay ang sarili sa mga taong pili.

⁷Pagkat mas mabuting sabihin sa iyong, “Halika rito,” kaysa hamakin ka sa harap ng marami.

⁸Ang nakita mo'y huwag agad dalhin sa hukuman, baka sa bandang huli'y lumabas ka pang may kasalanan.

⁹Kung may alitan kayo ng iyong kapwa, ilihim at lutasin agad at baka lumala.

¹⁰Baka ito ay malantad sa kaalaman ng madla at kayo'y malagay sa kahiya-hiya.

¹¹Kapag angkop sa panahon ang salitang binigkas, para itong ginto sa lalagyang pilak.

¹²Ang magandang payo sa marunong makinig ay higit na di hamak sa ginto o mamahaling alahas.

¹³Ang sugong tapat ay kasiyahan ng nagsugo sa kanya, tulad ng malamig na tubig sa panahon ng tag-araw.

¹⁴Ang taong puro pangako lamang ay parang ulap at hanging walang dalang ulan.

¹⁵Sa malumanay na pakiusap pusong bato'y nababagbag, sa pagtitiyaga pati hari ay nahihikayat.

¹⁶Huwag kakain ng labis na pulot-pukyutan at baka ito'y isuka mo lang.

¹⁷Huwag mong dadalasan ang dalaw sa kapwa, baka siya mabagot at sa iyo'y magsawa.

¹⁸Ang taong sumasaksi laban sa kapwa nang walang katotohanan ay tulad ng tabak, pambambo o palasong pumapatay.

¹⁹Ang taksil na pinagtiwalaan sa panahon ng pangangailangan ay tulad ng ngiping umuuga at mga paang pilay.

²⁰Hapdi ang dulot ng awit sa pusong may sugat, parang asing ikinuskos sa gasgas na balat, parang paghuhubad ng damit sa panahon ng taglamig.

²¹Kapag nagugutom ang iyong kaaway, pakainin mo at painumin kung siya'y nauuhaw.

²²Sa gayo'y mailalagay mo siya sa kahihiyan at tatanggap ka pa ng gantimpala mula kay Yahweh.

²³Kung paanong ang hanging timog ay nagdadala ng ulan, nagdadala naman ng galit ang paninira ng karangalan.

²⁴Masarap pa ang tumira sa bubungan ng bahay kaysa loob ng bahay na ang kasama'y asawang madaldal.

²⁵Kung paano ang malamig na tubig sa labing nauuhaw, gayon ang mabuting balita buhat sa malayong bayan.

²⁶Bukal na nilabo o balong nadumihan ang katulad ng matuwid na sa masama ay nakipagkaibigan.

²⁷Kung paanong masama ang labis na pulot-pukyutan, gayon din ang pagkagahaman sa karangalan.

²⁸Ang taong walang pagpipigil ay tulad ng lunsod na walang tanggulan, madaling masakop ng mga kaaway.