Read Magandang Balita Biblia Mga Kawikaan 30 Bible Online

Mga Kawikaan 30 - Magandang Balita Biblia bible

Mga Kawikaan 30

¹Mga kawikaan ni Agur na anak ni Jakeh ng Massa. Ito ang sinabi niya kina Itiel at Ucal: “Ang Diyos ay malayo sa akin, wala akong magagawa.

²Ako ay mangmang, alangang maging tao. Wala akong karunungan, hindi ako matalino.

³Di ako nakapag-aral, kaya ako ay mangmang, walang karunungan, walang alam sa Maykapal.

⁴Sino ang dalubhasa tungkol sa kalangitan? Sino ang nakapigil ng hangin sa kanyang palad? Sino ang nakapagbalot ng tubig sa isang damit? Sino ang naglagay ng mga hangganan sa daigdig? Sino siya? Sino ang kanyang anak?

⁵“Ang lahat ng salita ng Diyos ay mapananaligan at siya ang kanlungan ng mga nananalig sa kanya.

⁶Huwag mong daragdagan ang kanyang salita sapagkat pagsasabihan ka niya bilang isang sinungaling.”

⁷Diyos ko, may hihilingin akong dalawang bagay bago ako mamatay:

⁸Huwag akong hayaang maging sinungaling. Huwag mo akong payamanin o paghirapin. Sapat na pagkain lamang ang ibigay mo sa akin.

⁹Baka kung managana ako ay masabi kong hindi na kita kailangan. Baka naman kung maghirap ako'y matutong magnakaw, at pangalan mo'y malapastangan.

¹⁰Ang alipin ay huwag mong sisiraan sa kanyang amo, baka isumpa ka niya't pagbayarin sa ginawa mo.

¹¹May mga taong naninira sa kanilang ama, masama ang sinasabi tungkol sa kanilang ina.

¹²May mga taong nagmamalinis sa sarili, ngunit ang totoo'y walang kasindumi.

¹³May mga taong masyadong palalo, ang akala nila'y kung sino na sila.

¹⁴May mga tao namang masyadong masakim, pati mahihirap, kanilang sinisiil.

¹⁵Ang linta ay may dalawang anak, “Bigyan mo ako, bigyan mo ako,” ang lagi nilang hiling. May apat na bagay na kailanma'y di masiyahan:

¹⁶Ang libingan, ang babaing walang anak, ang lupang tuyo na laging nais matigmak, at ang apoy na naglalagablab.

¹⁷Ang anak na kumukutya sa kanyang ama at laging sumusuway sa salita ng ina, tutukain ng uwak ang kanilang mata at kakainin ng buwitre ang kanilang bangkay.

¹⁸May apat na bagay na di ko maunawaan:

¹⁹Ang paglipad ng agila sa kalangitan, ang paggapang ng ahas sa ibabaw ng batuhan, ang paglalayag ng barko sa karagatan, at ang babae't lalaking nagmamahalan.

²⁰Ganito naman ang ginagawa ng asawang nagtataksil: makikipagtalik, pagkatapos ay magbibihis saka sasabihing wala siyang ginagawang masama.

²¹May apat na bagay na yayanig sa daigdig:

²²Ang aliping naging hari, ang isang mangmang na sagana sa pagkain,

²³ang babaing masungit na nagkaasawa, at ang isang aliping babaing pumalit sa kanyang amo.

²⁴Sa daigdig ay may apat na maliliit na hayop ngunit may pambihirang kaisipan.

²⁵Ang mga langgam: sila ay mahina subalit nag-iipon ng pagkain kung tag-araw.

²⁶Ang mga kuneho: mahihina rin sila subalit nakagagawa ng kanilang tirahan sa batuhan.

²⁷Ang mga balang: bagama't walang haring sumusubaybay ay lumalakad nang maayos at buong inam.

²⁸Ang mga butiki: [4] maaaring hawakan sa iyong palad dahil sa kaliitan, subalit nasa palasyo ng hari at doon naninirahan.

²⁹May apat na bagay na kasiya-siyang pagmasdan sa kanilang paglakad:

³⁰Ang leon, pinakamatapang na hayop at kahit kanino ay di natatakot.

³¹Ang tandang na magilas, ang kambing na mabulas, at ang hari sa harap ng bayan.

³²Kung sa kahangalan mo'y naging palalo ka at nagbalak ng masama, mag-isip-isip ka.

³³Batihin mo ang gatas at may mantekilya ka; suntukin mo ang ilong ng iyong kapwa at dudugo nang sagana; guluhin mo ang iba at mapapaaway ka.