Read Magandang Balita Biblia Mga Kawikaan 6 Bible Online

Mga Kawikaan 6 - Magandang Balita Biblia bible

Mga Kawikaan 6

¹Aking anak, sa utang ba ng iba ikaw ay nananagot?

²Ikaw ba ay nangako, sa utang niya ay nasangkot?

³Kung gayon ay nasasakop ka ng kanyang pagpapasya, ngunit ito ang gawin mo nang makaiwas sa problema: Ikaw ay magmadali sa kanya ay makiusap, sabihin mong pawalan ka sa napasukan mong bitag.

⁴Huwag kang titigil, huwag kang maglulubay, ni huwag kang iidlip, hanggang walang kalayaan.

⁵Iligtas ang sarili mo parang usang tumatakas, at tulad niyong ibong sa kulunga'y umaalpas.

⁶Tingnan mo ang mga langgam, ikaw na taong ubod ng tamad, pamumuhay niya'y masdan mo at nang ikaw ay mamulat.

⁷Kahit sila'y walang pinunong sa kanila'y nag-uutos, walang tagapamahala o tagamasid na sinusunod,

⁸ngunit nag-iimbak ng pagkain sa tag-araw, kailanga'y iniipon kung panahon ng anihan.

⁹Hanggang kailan, taong tamad mananatili sa higaan, kailan ka babalikwas sa iyong pagkakahimlay?

¹⁰Kaunting tulog, bahagyang idlip, sandaling pahinga at paghalukipkip,

¹¹samantalang namamahinga ka ang kahirapa'y darating na parang armadong magnanakaw upang kunin ang lahat ng iyong kailangan.

¹²Taong walang kuwenta at taong masama, kasinungalingan, kanyang dala-dala.

¹³Ang mata ay ikikindat o kaya'y ipipikit, ikukumpas pa ang kamay upang ikaw ay maakit.

¹⁴Ngunit sa sarili ay may masamang iniisip, ang lagi niyang nais ay manggulo sa paligid.

¹⁵Dahil dito, kapahamakan niya'y biglang darating, sa sugat na tatamuhi'y hindi na nga siya gagaling.

¹⁶Ang kinamumuhian ni Yahweh ay pitong bagay, mga bagay na kanyang kinasusuklaman:

¹⁷kapalaluan, kasinungalingan, at mga pumapatay sa walang kasalanan,

¹⁸pusong sa kapwa'y walang mabuting isipan, mga paang ubod tulin sa landas ng kasamaan,

¹⁹saksing sinungaling, mapaglubid ng buhangin, pag-awayin ang kapwa, laging gusto niyang gawin.

²⁰Aking anak, utos nga ng ama mo ay sundin, huwag mong tatalikuran, turo ng inang giliw.

²¹Sa puso mo ay iukit, at itanim mo sa isip.

²²Pagkat ang aral na ito sa iyo ay patnubay, sa pagtulog mo ay bantay, sa paggawa ay alalay.

²³Pagkat ang utos ay ilaw, ang turo ay tanglaw, at daan ng buhay itong mga saway.

²⁴Ilalayo ka nito sa babaing masama, sa mapang-akit niyang salita ngunit puno ng daya.

²⁵Huwag mong nanasain ang ganda niyang taglay, ni huwag paaakit sa tingin niyang mapungay.

²⁶Babaing masama'y maaangkin sa halaga ng tinapay, ngunit bunga'y kasamaan sa buo mong pamumuhay.

²⁷Kung ang tao ba'y magkandong ng apoy, kasuotan kaya niya'y di masusunog niyon?

²⁸Kung ang tao ay tumapak sa uling na nagbabaga, hindi kaya malalapnos itong kanyang mga paa?

²⁹Ganoon din ang taong sisiping sa asawa ng kapwa, tiyak siyang magdurusa pagkat ito ay masama.

³⁰Ang sinumang magnakaw ay tiyak na nagkasala, kahit iyon ay pamawi sa gutom na taglay niya.

³¹Ang bayad ay makapito kung siya'y mahuli, ang lahat niyang pag-aari ay kulang pang panghalili.

³²Ngunit ang nangangalunya ay isang taong mangmang, sinisira ang sarili, buhay niya at pangalan.

³³Ang tangi niyang mapapala ay pahirap sa sarili, ang kanyang kahihiyan, hindi na niya mababawi.

³⁴Sapagkat ang panibugho sa tao ay nag-uudyok, ang puri nga ay ibangon, kahit buhay ay malagot.

³⁵Wala kang itutumbas para kamtin ang patawad, kahit gaano pa kalaki ang sa kanya ay ibayad.