Read Magandang Balita Biblia Mga Kawikaan 8 Bible Online

Mga Kawikaan 8 - Magandang Balita Biblia bible

Mga Kawikaan 8

¹Hindi mo ba naririnig ang tawag ng karunungan, at ang tinig ng unawa'y hindi pa ba napakinggan?

²Nasa dako siyang mataas, sa tagpuan ng mga landas;

³nasa mga pintuan siya, sa may harap nitong bayan, nakatindig sa pagpasok at ito ang kanyang sigaw:

⁴“Kayo'y tinatawagan ko, tao ng sandaigdigan, para nga sa lahat itong aking panawagan.

⁵Kayong walang nalalaman ay mag-aral na maingat, at kayong mga mangmang, pang-unawa ay ibukas.

⁶Salita ko ay pakinggan pagkat ito'y mahalaga, bumubukal sa labi ko ay salitang magaganda.

⁷Pawang katotohanan itong aking bibigkasin, at ako ay nasusuklam sa lahat ng sinungaling.

⁸Itong sasabihin ko ay pawang matuwid, lahat ay totoo, wala akong pinilipit.

⁹Ito ay maliwanag sa kanya na may unawa, at sa marurunong ito ay pawang tama.

¹⁰Payo ko'y pahalagahan nang higit pa sa pilak, at ang dunong, sa ginto ay huwag sanang itutumbas.

¹¹“Pagkat akong karunungan ay mahigit pa sa hiyas, anumang kayamanan ay hindi maitutumbas.

¹²Ako ay nagbibigay ng talas ng kaisipan, itinuturo ko ang landas ng hinaho't karunungan.

¹³Ang paggalang at pagsunod kay Yahweh ay naglalayo sa kasamaan. Ako ay namumuhi sa lahat ng kalikuan, sa salitang baluktot, at sa diwang kayabangan.

¹⁴Mayroon akong lakas at taglay na kakayahan, ganoon din naman, unawa't kapangyarihan.

¹⁵Dahil sa akin, ang hari'y nakapamamahala, nagagawa ng mga pinuno ang utos na siyang tama.

¹⁶Talino ng punong-bayan ay sa akin nagmumula, at ako rin ang dahilan, dangal nila't pagdakila.

¹⁷Mahal ko silang lahat na sa aki'y nagmamahal, kapag hinanap ako nang masikap, tiyak na masusumpungan.

¹⁸Ang yaman at karangalan ay aking tinataglay, kayamanang walang maliw, kasaganaan sa buhay.

¹⁹Ang bunga ko ay higit pa sa gintong dinalisay, mataas pa kaysa pilak ang halagang tinataglay.

²⁰Ang landas kong dinaraanan, ay daan ng katuwiran, ang aking tinatahak, ay landas ng katarungan.

²¹Ang sa aki'y nagmamahal binibigyan ko ng yaman, aking pinupuno ang kanilang mga sisidlan.

²²“Sa lahat ng nilikha ni Yahweh, ako ang siyang una, noong una pang panahon ako ay nalikha na.

²³Matagal nang panahon nang anyuan niya ako, bago pa nalikha at naanyo itong mundo.

²⁴Wala pa ang mga dagat nang ako'y lumitaw, wala pa ang mga bukal ng tubig na malilinaw.

²⁵Wala pa ang mga burol, ganoon din ang mga bundok, nang ako ay isilang dito sa sansinukob.

²⁶Ako muna ang nilikha bago ang lupa at bukid, nauna pa sa alabok, at sa lupang daigdig.

²⁷Nang likhain ang mga langit, ako ay naroroon na, maging nang ang hangganan ng langit at lupa'y italaga.

²⁸Naroon na rin ako nang ang ulap ay ilagay, at nang kanyang palitawin ang bukal sa kalaliman.

²⁹Nang ilagay niya ang hangganan nitong dagat, nang ang patibayan ng mundo ay ilagay at itatag,

³⁰ako'y lagi niyang kasama at katulong sa gawain, ako ay ligaya niya at sa akin siya'y aliw.

³¹Ako ay nagdiwang, nang daigdig ay matapos, dahil sa sangkatauhan, ligaya ko ay nalubos.

³²“At ngayon, aking anak, ako nga ay pakinggan, sundin ang payo ko't liligaya ang iyong buhay.

³³Upang maging matalino, ang turo ko ay dinggin mo, huwag mong pababayaan ni lalayuan ito.

³⁴Mapalad ang taong sa akin ay nakikinig, sa akin ay nag-aabang at palaging nakatitig.

³⁵Pagkat ang makasumpong sa akin ay nakasumpong ng buhay, at ang kalooban ni Yahweh ay kanyang nakakamtan.

³⁶Ngunit ang di makasumpong sa akin, sarili ang sinasaktan, ang napopoot sa akin, iniibig ay kamatayan.”