Read Magandang Balita Biblia Ang Karunungan ni Solomon 2 Bible Online

Ang Karunungan ni Solomon 2 - Magandang Balita Biblia bible

Ang Karunungan ni Solomon 2

¹Ang walang kabuluhang pangangatuwiran ng masama ay ganito: “Maikli at malungkot ang buhay,” wika nila sa sarili, “at wala nang lunas pagdating ng wakas ng buhay ng tao, wala na ring patay na nakakabalik mula sa libingan.

²Pagkakataon lamang ang pagkasilang sa atin; pagkatapos, tayo'y papanaw at parang di isinilang. Ang hininga natin ay tulad lamang ng usok, at ang isipa'y parang tilamsik na mula sa pintig ng puso.

³Pagtigil ng pintig na iyon, ang ating katawang lupa ay babalik sa alabok, at maglalaho ang ating espiritu kasama ng hanging nagdaraan.

⁴Sa kalaunan, malilimot na ang ating pangalan, pati ang ating mga nagawa. Mawawala ang buhay natin, parang balumbon ng mga ulap, matutunaw na parang hamog sa init ng araw.

⁵Ang buhay natin ay lumilipas na parang anino, ang araw ng pagkamatay ay hindi maiiwasan, nakatakda na iyon at wala nang makakapagbago.”

⁶Sabi pa rin nila, “Kaya nga, magpakasawa tayo sa lahat ng bagay; gaya ng ginawa natin noong tayo'y bata pa at magpakasaya tayo sa kagandahan ng sangnilikha.

⁷Magpakasawa tayo sa mamahaling alak at pabango, at huwag palampasin isa mang bulaklak sa panahon ng tagsibol.

⁸Pitasin natin ang mga rosas bago ito malanta, at isuksok sa ating buhok habang sariwa pa ito at mabango.

⁹Magsama-sama tayo sa ating pagdiriwang. Mag-iwan tayo ng bakas ng kasaysayan sa lahat ng dako, sapagkat ito'y ating buhay; ito'y ating karapatan.

¹⁰“Apihin natin ang mahihirap kahit na sila ay matuwid. Pahirapan natin ang mga biyuda. Huwag nating igalang maging ang matatanda.

¹¹Ang pairalin nating batas ay ang ating lakas, sapagkat wala tayong mapapala sa pagiging mahina.

¹²Tambangan natin ang mga taong matuwid, sapagkat hadlang sila sa ating mga balak. Ipinamumukha nila sa atin ang pagsuway sa kautusan, at sinasabing tayo'y nagkasala laban sa ating kaugalian.

¹³Ipinagmamalaki nilang nakikilala nila ang Diyos, at sinasabing sila'y mga anak ng Panginoon.

¹⁴Sila ang nagbibigay sa atin ng mga problema.

¹⁵Makita lang natin sila'y balisa na tayo, sapagkat kaiba ang kanilang gawain at pamumuhay.

¹⁶Ang palagay nila sa atin ay mababang-mababa, at nandidiri sila sa ating gawain. Sinasabi nilang kaligayahan ang wakas ng matuwid, at ipinagmamagaling na sila'y anak ng Diyos.

¹⁷Tingnan natin kung ang sinasabi nila'y magkakatotoo, kung ano ang mangyayari sa kanila pagkamatay nila.

¹⁸Kung ang mga matuwid ay anak nga ng Diyos, sila ay tutulungan niya at ililigtas sa mga kaaway.

¹⁹Subukin natin silang kutyain at pahirapan, upang malaman natin kung hanggang saan ang kanilang kabutihang-loob, at kung hanggang kailan sila makakatagal.

²⁰Subukin nating ilagay sila sa bingit ng kamatayan, dahil ang sabi nila ay iingatan sila ng Diyos.”

²¹Iyon ang pangangatuwiran ng masasama, ngunit sila'y nagkakamali, sapagkat binubulag sila ng kanilang kasamaan.

²²Hindi nila nabatid ang lihim na panukala ng Diyos. Hindi sila umasa sa gantimpala ng kabanalan, hindi naisip ang magandang wakas ng malinis na pamumuhay.

²³Sapagkat ang tao'y hindi nilikha ng Diyos para mamatay, kundi upang maging larawan niyang buháy.

²⁴Ngunit dahil sa pakana ng diyablo, nakapasok ang kamatayan at ito ang kahihinatnan ng mga napailalim sa kanya.