Read Magandang Balita Biblia Ecclesiastico 1 Bible Online

Ecclesiastico 1 - Magandang Balita Biblia bible

Ecclesiastico 1

¹Papuri sa Karunungan Mula sa Panginoon ang lahat ng karunungan, at iyon ay taglay niya magpakailanman.

²Sino ang makakabilang ng buhangin sa dagat, o ng patak ng ulan, o ng mga araw, o sa panahong walang pasimula at walang katapusan?

³Sino ang makakasukat sa taas ng langit, o sa lawak ng lupa? Sino ang makakaarok sa karagatan at sino ang makakasaliksik sa Karunungan?

⁴Bago pa likhain ang alinmang nilalang, nalikha na ang Karunungan, at ang tunay na pagkaunawa, bago pa nagsimula ang mga panahon.[1]

⁶Kanino ipinahayag ang simula ng Karunungan, at sinong nakakaalam ng kanyang pamamaraan?[2]

⁸Iisa lamang ang talagang marunong; dapat tayong gumalang na may paghanga sa harap ng kanyang luklukan.

⁹Ang Panginoon ang lumikha ng Karunungan, kinilala niya ang kahalagahan nito at ibinuhos niya ito sa lahat ng kanyang nilalang.

¹⁰Binahaginan niya ng Karunungan ang lahat ng tao, ngunit higit na masagana ang kaloob niya sa mga umiibig sa kanya.[3]

¹¹Kung may paggalang ka sa Panginoon, magkakamit ka ng karangalan at kasiyahan, mapuputungan ka ng tuwa at kagalakan.

¹²Ang magparangal sa Panginoon ay nagdudulot ng kaligayahan at tuwa, nagkakaloob ng buhay na mahaba at maligaya.[4]

¹³Ang may paggalang sa Panginoon ay sasagana sa bandang huli; pagpapalain siya sa oras ng kamatayan.

¹⁴Ang paggalang sa Panginoon ay simula ng tunay na Karunungan; sa sinapupunan pa ng ina'y kasama na siya ng mga tapat.

¹⁵Nanirahan siya[5] sa gitna ng mga tao mula pa noong una at magtitiwala sa kanya ang mga susunod na salinlahi.

¹⁶Ang may paggalang sa Panginoon ay siyang nagkakamit ng pinakamataas na Karunungan; mag-uumapaw sa kanila ang kanyang masaganang bunga,

¹⁷pinasasagana niya sa mabubuting bagay ang kanilang tahanan, pinupuno niya ng masaganang ani ang kanilang[6] mga kamalig.

¹⁸Ang paggalang sa Panginoon ay magandang bulaklak ng Karunungan, na nagdudulot ng kapayapaan at kalusugan.[7]

¹⁹Namamahagi siya ng kaalaman at ganap na pagkaunawa; ang nagpapahalaga sa kanya ay kanyang pinaparangalan at pinagiging tanyag.

²⁰Ang paggalang sa Panginoon ay siyang ugat ng Karunungan, at ang mga sanga naman nito ay mahabang buhay.[8] Pagtitimpi sa Sarili

²²Ang marahas na galit ay laging walang katuwiran; mapapahamak ang tao sa sandaling padala siya sa kanyang galit.

²³Maghintay ka at magtimpi, at sa huli ay hindi mo ito pagsisisihan.

²⁴Huwag kang magsalita hanggang hindi napapanahon; pagkatapos, igagalang ng lahat ang iyong katalinuhan. Ang Karunungan at ang Paggalang sa Diyos

²⁵Ang Karunungan ay may magagandang aral na iniingatan, ngunit ang makasalanan ay nasusuklam sa kabanalan.

²⁶Sundin mo ang Kautusan, kung nais mo ng Karunungan; ito'y masaganang ipagkakaloob sa iyo ng Panginoon.

²⁷Ang paggalang sa Panginoon ay karunungan at kaalaman; nalulugod siya sa matapat at mababang-loob.

²⁸Huwag mong itatakwil ang paggalang sa Panginoon; huwag kang dudulog sa kanya nang di tapat sa loob.

²⁹Pag-ingatan mo ang iyong pananalita, at huwag kang magkukunwari sa paningin ng mga tao.

³⁰Huwag kang magmamataas, baka ka bumagsak at sukdulang mapahiya. Ihahayag ng Panginoon ang iyong mga lihim, at hihiyain ka niya sa harap ng madla, sapagkat dumulog ka sa kanya nang walang paggalang, at ang puso mo'y puno ng pandaraya.