Read Magandang Balita Biblia Ecclesiastico 12 Bible Online

Ecclesiastico 12 - Magandang Balita Biblia bible

Ecclesiastico 12

¹Mga Tuntunin sa Paggawa ng Mabuti Kung gagawa ka ng mabuti, tiyakin mo kung kanino mo gagawin iyon, upang pasalamatan ka sa iyong pagmamagandang-loob.[29]

²Kapag gumawa ka ng mabuti sa taong maka-Diyos, tiyak na tatanggap ka ng gantimpala; kung hindi mula sa kanya, ay mula sa Kataas-taasan.

³Walang matatamong kabutihan ang gumagawa ng masama, o ang hindi tumutulong sa mga dukha.

⁴Tulungan mo ang mga taong may takot sa Diyos, huwag ang mga makasalanan.

⁵Gawan mo ng mabuti ang mababang-loob; huwag mong bigyan ng anuman ang palalo. Huwag mo siyang bibigyan ng pagkain; gagamitin lamang niya ang kabaitan mo laban sa iyo. Patung-patong na kapinsalaan ang sasapitin mo, bilang ganti sa kabutihang ginawa mo sa kanya.

⁶Pati ang Kataas-taasang Diyos ay napopoot sa makasalanan, at paparusahan niya sila sa takdang panahon.

⁷Ang bigyan mo ay ang mabubuting tao, at huwag mong tulungan ang mga makasalanan. Tunay at Di Tunay na Kaibigan

⁸Sa panahon ng kasaganaan, hindi mo makikilala ang tunay na kaibigan, at sa panahon naman ng kasawian, hindi maikakaila ang kaaway.

⁹Kapag ikaw ay masagana, pati ang kaaway ay nagmamagandang-loob,[30] ngunit pagsapit ng dagok ng kapalaran, mawawala ang mga kaibigan.

¹⁰Huwag kang magtitiwala kailanman sa kaaway; kung paanong ang kalawang ay sumisira sa bakal, ang galit niya sa iyo'y pilit na iiral.

¹¹Kahit na siya'y lumapit sa iyong maamo at mapayapa, mag-ingat ka, at manatili kang handa. Ang katulad niya'y salaming metal, sinisira ng kalawang kapag hindi kinuskos.

¹²Huwag mo siyang patatayuin sa tabi mo, baka patalsikin ka niya at kunin ang iyong puwesto. Huwag mo rin siyang pauupuin sa iyong kanan, baka agawin pa niya sa iyo ang iyong luklukan. At saka mo lamang mauunawaan ang payo ko, at magsisisi ka kapag naalala mo iyon.

¹³Sinong maaawa sa tawak kapag siya'y natuklaw ng ahas, o sa taong nag-aalaga ng mabangis na hayop, kung siya'y silain nito?

¹⁴Wala ring maaawa sa taong nakikisalamuha sa masasama, kung dahil sa mga ito'y masangkot siya sa kasalanan ng iba.

¹⁵Habang ikaw ay matatag, ang kaaway ay hindi hahakbang laban sa iyo, ngunit kapag ikaw ay bumagsak, hindi niya palalampasin ang pagkakataon.

¹⁶Magagandang salita ang namumutawi sa labi ng kaaway, ngunit ang iniisip niya'y ang iyong kapahamakan. Maaaring iyakan ka pa niya kunwari, subalit kapag nagkaroon siya ng pagkakataon, hindi niya panghihinayangan ang iyong buhay.

¹⁷Kapag dinatnan ka ng sakuna, lalapitan ka niya kunwari upang tulungan ka, ngunit ang totoo, upang ikaw ay lalong ilubog.

¹⁸Pagkatapos, buong kasiyahang ipamamalita niya ang nangyari sa iyo, at sa gayo'y mapagkikilala ang tunay niyang kulay.