Read Magandang Balita Biblia Ecclesiastico 14 Bible Online

Ecclesiastico 14 - Magandang Balita Biblia bible

Ecclesiastico 14

¹Tunay na Kaligayahan Mapalad ang taong hindi nadudulas sa pananalita, at di binabagabag ng kanyang mga sinabi.

²Mapalad ang taong hindi sinusumbatan ng sariling budhi, at hindi nawawalan ng pag-asa. Ang Kasakiman

³Hindi dapat ang salapi sa kuripot, ano ang mapapala ng kuripot sa kanyang kayamanan?

⁴Ang nagdadamot sa sarili ay nag-iimpok para sa iba, ang mga ito ang magpapasasa sa kanyang pinaghirapan.

⁵Ang maramot sa sarili'y kanino pa magbibigay, kayamanang naipon niya'y hindi niya papakinabangan.

⁶Wala nang hihigit pa sa karamutan ng maramot sa sariling kapakanan, karamutang taglay niya'y siya na ring kaparusahan.

⁷Gumawa man siya ng mabuti'y hindi niya sadya ang kabutihan, at hindi magtatagal ay malalantad ang kanyang kasakiman.

⁸Kaysama ng taong gahaman ang pananaw, walang paglingap at malasakit sa kanyang kapwa.

⁹Laging akala ng sakim ay kakaunti ang kinamtan, pagkat ang damdamin niya'y pinuspos ng kasakiman.

¹⁰Pagkain ng kuripot ay kanya pang pinanghihinayangan, kaya't walang nakahain sa kanyang hapag-kainan.

¹¹Anak, kumain kang mabuti ayon sa iyong kakayahan, at lagi kang mag-alay ng marapat na handog sa Panginoon.

¹²Alalahanin mong sigurado kang mamamatay, ngunit hindi mo alam kung kailan iyon.

¹³Gumawa ka ng mabuti sa mga kaibigan mo bago ka mamatay, tulungan mo sila sa abot ng iyong makakaya.

¹⁴Huwag mong palalampasin ang isang araw na di ka magsasaya. Kung may nais kang gawin na hindi naman kasalanan, huwag kang mag-atubiling gawin iyon.

¹⁵Darating ang panahong paghahati-hatian ng iba ang iyong pinagpaguran, at sila ang magpapasasa sa iyong tinipid na kayamanan.

¹⁶Mamigay ka nang masaya at malugod ka namang tumanggap, habang ikaw ay nabubuhay, maglibang ka at magpakaligaya. Sa daigdig ng mga patay, wala ka nang ganitong malalasap.

¹⁷Ang katawan ng tao ay malulumang parang damit, ayon sa matandang kautusan tayong lahat ay mamamatay.

¹⁸Tayong mga tao ay parang mga dahon ng isang malagong punongkahoy, habang may nalalaglag ay mayroong umuusbong; mayroon sa ating namamatay at mayroon namang isinisilang.

¹⁹Masisirang lahat ang ginawa ng kamay ng tao, at pati ang may gawa ay kasama nilang maglalaho. Kaligayahan ng Marunong

²⁰Mapalad ka, O tao, kung binubulay mo ang Karunungan, at nangangatuwiran ka nang may katalinuhan.

²¹Mapalad ka kung pinag-aaralan mo ang kanyang mga tuntunin, at sinasaliksik ang kanyang mga lihim.

²²Mapalad ka kung nagmamanman ka sa kanya na parang isang mangangaso, at nag-aabang sa kanyang daraanan.

²³Mapalad ka kung sumisilip ka sa kanyang mga durungawan, at nakikinig ka sa kanyang mga pintuan.

²⁴Mapalad ka kung naninirahan ka sa kanyang piling; sa kanyang mga muog nagbabaon ng tulos ng tolda,

²⁵at nagtatayo ng tolda sa tabi ng kanyang bahay— ang pinakamainam na lugar upang tirahan ng tao.

²⁶Sa lilim ng Karunungan palalakihin mo ang iyong mga anak,

²⁷siya ang magiging kanlungan mo sa init ng araw, at maninirahan ka sa kanyang kaningningan.